أسرار أسرار... تظهر من ضلع المظلومه ومن نعش الحسن

دم الكرار دم الكرار... هو اللي خله حسين إيظل جسمه إبلا جفن

و إحنه إنتابع ...هذا الواقع

محن تفني الجبال و تخسف الأقمار...مصايب مرهبات إمطلسمه بأسرار

غصص آل الرسول و لوعة الأطهار...مصادرها تعود الغيبة المختار

كسر ضلع الوديعه و طبرة الكرار...و سم الحسن و الطف و الخيم و النار

هاي اللوعات...هاي اللوعات ...مصدرهن فقد الهادي و نعشه الما مندفن

خلّف مأسات... خلّف مأسات...هو اللي سبب هاللوعات و هذا الحزن

إبعينك طالع... ...هذا الواقع

إبزمان الهادي جانت آمنه العتره...و لا جاحد يمسهم حته بالنظره

بعد ما عرج و غاب النبي إبقبره...عصف عاصف ضلاله إبحقده و بغدره

إقتحم دار النبوه و هجم عالزهره...كسر ضلع الشمس و إتفاخر إبكسره

نار الويلاه ... نار الويلاه ...عالزهره إتشب و تسعر ما تخمد للأبد

إنا لله... إنا لله...لا حولَ و لا قوةَ إلا باللهِ الأحد

هو الصانع... ...هذا الواقع

إبدفن هادينه جان المرتضه وحده...عضد ما عاضده و لا مسند إيسنده

تكرر هالحدث عالزهره من بعده...دفنها إبليل ظلمه و القبر جبده

قبلما ما ينوضع جثمانها إبلحده...بجه و بسيوف دمعاته حفر خده

شنهو الأسباب...شنهو الأسباب...خل نسمعها البضعه إشقالت من وصت علي

يا داحي الباب... يا داحي الباب...إدفني إبليل و إمنع خصمي يحضر إلي

شنهو الدافع... ...هذا الواقع

محن عصفت عله العتره إبرياح الشر...و مصايب تدعي وجه الدنيه يتذمر

إذا مرت عله الأوتاد تتأثر...لونها إنصبت إبصفوان يتفسر

بدايتها إبضلع للطاهره إتكسر...و يثنيها النجيع السال من حيدر

دمه اللي سال... دمه اللي سال...يكشف لك هاي الأمه إشتتحمل من إثم

عبر الأجيال...عبر الأجيال...تتنقل هاي الحاله و لا بد ما تنحسم

إلمن نافع... ...هذا الواقع

عبر كل السنين و مهجة الأعوام...نحاسب من يعادي العترة الأكرام

إشبدر من فاطمه إبغصب الفدك تنضام ...ليش إنطبر راس المرتضه الضرغام

الحسن منه إشبدر يا أمة الإسلام ...و ليش إبدفنه يرمون النعش بسهام

نسأل و إنقول... نسأل و إنقول ...و اليملك ذرة غيره إيجاوب من ينسأل

سبط المرسول ...سبط المرسول...يا داعي و ليش إتصوب نعشه إبرمي النبل

منهو يخادع ...هذا الواقع

حديث و كلهم من المصطفه سمعوه...الحسن سيد شباب الجنه و إيعرفوه

عوض ما قدره هذا الشامخ إيجلوه...إجو بالسم عليه إبلا ذنب غدروه

عوض ما نعشه يم جده النبي يدفنوه...الحسن جثمانه بسهام الغدر صابوه

المرسل لو جان ...المرسل لو جان ...شيجاوب هاي الناس اللي غدرت عترته

وين الوجدان ... وين الوجدان ...خل ينظر شنهو اللي بالطف سوت أمته

و الحق ضايع ...هذا الواقع

الحسن نعشه ابمرامي الجور صابنه...عقب دفنه فلا غضوا نظر عنه

للطف تابعوه إقطعوا نحر إبنه ...و من دم النحر جف جاسم إتحنه

عجيبه إعيون عمه إشلون شافنه...ينازع بالمنايه و يجذب الونه

بالطف أجساد... بالطف أجساد ...مصروعه و آخرهم جسم المظلوم إنصرع

فوق المياد ...فوق المياد...يتلاله و مثل الكوكب راس حسين إنرفع

و إيظل شايع ...هذا الواقع