زَينَب وَينْ .. عينْ بِعينْ .. طول اللّيل / هيّه وراس العَباس

قصّة إِبطَريق الشّام يِرويها الاحساس ..أُم الخِدر شِتقول مِنْ شُبگت الرّآس

سَكتَه وكلام عيون ما تِسمع النّاس ..والضَحه بِالچفّين بِعيونَه يِنباس

يِتلآقون .. بَس إعيون .. شيِقولون / هيّه ورآس العَبآس

رآعي العَلم بَس عين يِبچي عليها ..عِند العَقيلَه إِثنين و أكثَر بَجيها

إختَك يَبو النّوماس مَچتوفَه إِيديها ..تِتذَكر الأيّام وتِذكره َبيها

ليش إتِروح ..وإنتَه الرّوح .. والمَجروح / هيّه ورآس العَبآس

تِذكُر زِمان الرآح چنّه سِويّه ..ما أَمشي إِلا إوياك إيدَك بِيديّه

مَرّه قِلتْ عبّاس ما يِدري بيّه ..بَس أَلتِفتْ أَلقاك عينَك عليّه

ضيّعناه .. كِل مَعناه .. آه وآه / هيّه ورآس العَبآس

أذكُر يَنور العين وإنتي تِذكرين ..چنتْ أَقعد أَبچي ويّاچ منْ إنتي تِبچين

حارِس أَظل ما أنام لَمّن تِنامين ..قَبلِچ أَفِز مَرعوب لَمّن تِفزّين

تِتمنّين .. وتِأُمرين .. ما ناسين / هيّه ورآس العَبآس

يا زَينَب تِذكرين ذيچ اللّيالي ..آنَه اعلَه بالِج دوم وإنتي اعلَه بالي

لَو ساعَه صار إِغياب يِكثَر سُؤالي ..يا خويَه هِسه إِشلون حالِچ وحالي

بِالعَبرآت .. والآهات .. والنّظرات / هيّه ورآس العَبآس

يا خويَه گوم إِبساع قِعدتْ رُقيّه ..لآ تِختِرع بِاللّيل طِفلَه وسبيّه

يا زَينَب أَترجّاچ بوسيها ليّه ..أَنظُر عليها يِحوم طيرِ المِنيّه

ليلِ إِدموع .. طِفلَه إِتلوع .. والمَفجوع / هيّه ورآس العَبآس

قالَتْ لَه مِنْ الخوف يمك تِعنّيت ..تِذكُر يَمَنْ ما جيتْ مِن حِرگوا البيت

قالِ إِلها ما تِدرين وشقَدْ تِأذّيتْ ..لَمّن إِجه السّلاب أَحضَر تِمنّيت

دَمعِ إِمصاب .. صار إِعتاب .. بين أَحباب / هيّه ورآس العَبآس

تِدري السِلبني إشقَال لَمّن نِظرتَه ..وينْ الكفيل وليش ما يِحضر إختَه

ناده يَزينَب آه لَمّن سِمعتَه ..يا خويَه وتِعذريه القِطعوا يِمنتَه

قَلبي احتار .. يِلهَب نار .. هَذَا الصآر / هيّه ورآس العَبآس