عمري قضيته برباكم ...و أنتظر ساعة وفاكم

قلبي تدرون بمرامه ...و آنه أمكم يا نشامه ...و أنتظر ساعة وفاكم

ناس التدور كرامتها و فخرها ...ترخص الغالي الأجل عزت قدرها

و تقدر أصحاب المجد تتبع أثرها ...معبر الدنيه و ربح كلمن عبرها

و اليدور عن خلوده ...بالسعي و يبذل جهوده

و للخلود أضحت علامه...و آنه أمكم يا نشامه ...و أنتظر ساعة وفاكم

و بلطف رب العرش جلا ثناءه ...من عباده إبرحمته إختص أولياءه

و قارن أهل المعرفه ببعض أنبياءه ...و جنته للمخلص اليثبت وفاءه

و عزة المؤمن ثباته ...عنده أغله من حياته

و تضحيه إتريد الكرامه...و آنه أمكم يا نشامه ...و أنتظر ساعة وفاكم

و مّن عله إمكم خالق القدره إبرحمته ...و أشرف إبيوت البشر كلها دخلته

بيت اللي اتباهه الملك جان إبخدمته ...بالكرامه إتفسر الحلم الحلمته

و حلمي تفسيره إبشيمكم ...و بالربه تطلبكم أمكم

وجهي يبّيض بالقيامه...و آنه أمكم يا نشامه ...و أنتظر ساعة وفاكم

هذا خوكم هذا بن سيد البريه ...و هذا بن خير النسه الزهره الزجيه

ياللي وصاكم علي حامي الحميه ...هذا يوم البيه تنفذون الوصيه

و لمن إتطيعون أخوكم ...تنحسب طاعه الأبوكم

و يخسر الخالف كلامه ...و آنه أمكم يا نشامه ...و أنتظر ساعة وفاكم

عن أخوكم هالخبر هم سامعينه ...للنجاة إمحبته أوسع سفينه

و لو حده الطف كربله حسين الضعينه ...سيروا ظله العن يساره و عن يمينه

و كل وكت خلفه مشيكم ...و طيعوا لو يامر عليكم

طاعته إشراع السلامه ...و آنه أمكم يا نشامه ...و أنتظر ساعة وفاكم

هذا عباس القمر هيبة قدركم ...بالدرب صيروا كواكب وي قمركم

نفذوا أمره لو عله الواجب أُمركم ...و آنا لحسين إنذرت عمره و عمركم

و قلبي وياكم أودعه ...و راسي بيكم أرد أرفعه

و ما أعن ليلي و انامه ...و آنه أمكم يا نشامه ...و أنتظر ساعة وفاكم

و هذي زينب يا بو فاضل يبن أبوها ...و الإخت هيبتها من هيبة اخوها

بالدرب إنت و إخوتك رافقوها ...و إعله ناقتها النواظر علقوها

شوفوا شتريد اشطلبها ...و بالدرب أمنوا قلبها

إبوحشة الليل و ظلامه ...و آنه أمكم يا نشامه ...و أنتظر ساعة وفاكم