آخر الأخبار

ديوان السادة

ودعني و إرتاح يالماخذ عيوني

30 سطرًا

وَدِعني وارتاح يَالْماخِذ عيوني ... حتّى الدّمِع رآح ويّا الْيِودعوني

نار الهَجُر نار ... وبِروحي مِسمار

مو كِل مَن يِروح الرّوح تِمشي وياه ... ولا كِل مَن يِغيب إنِصيح منْ فَرقاه

أَخذتْ وياگ قَلبي وقَلبي وينْ أَلقاه ... يا جَرح الأَذِكرَه ويا جَرِح اَنساه

والضِلعَه مَگسور ونّاتَه مَسموعَه ... وانقِلّه مَعذور منْ يِجرَن ادموعَه

أصبُر على الصار ... وبِ روحي مِسمار

تَعال الرّوح عِطشَتْ رادَت تِشوفَك ... تَعال چفوفي حَنّتْ شوق لِچفوفَك

عِفتني بليلَه وَحشة وتِدري ما عوفَك ... يا گعبَة مُصابي ودَمعتي تِطوفَك

آه إِمنِ الأيّام جِرحتني بِالغالي ... كِل عُمري آلام والدّمعه تِحلى لي

ما عِندي أَنصار ... وبِ روحي مِسمآ

أَنا بِعيني أَشاهِد دَمعك اتهِلّه ... وَجهَگ يِنصُطر قِدام أَبو الحَملَه

سُكوتي إِبهَالوَضِع يا ناس مو سَهلَه ... أَسِل سيفِ الصّبر بتّاري ما أَسلّه

مرّه انظُر إِعليك مرّه انظُر اوليدي ... والسّكتَه تآذيك بَس ما يِصحُ بيدي

شِتِفيد الأَعذار ... وبِروحي مِسمآر

أَقلّك روح عَنّي وإستِراح انتَه ... أَنا قَلبي على التّوديع علمتَه

كَم صاحب قَبُل هَاليوم وَدّعتَه ... أظَل لِلبير أَسولِف قِصتي سَكتَه

يَالرايِد اتِروح ويآگ إِخذ روحي ... تِتركني مَجروح يا أَصعب جروحي

دار ال_زّم_ن دار ... وبِ روح_ي مِ_س_م_آر

أَرِد لِلدّار حّتى أتذَكّر أَيامَك ... أنَه مِضيّع وأَدوّر أَثر لِچدامَك

أَشوف الباب يِرسِم صورَة آلامَك ... بَعد عينِ المِشوا يا ليل ما نامك

يا نايِم اللّيل خلّيني بِهمومي ... أَسهَر على الويل منْ فارقِت نومي

خلّيني مِحتار ... وبِ روحي مِسمآر

عَجَب يا بو الوِفه ما تِذكر أَحبابَك ... تَعال وشوف حالي شلون بِغيابَك

وحَقّگ ما يِبس منْ مَدمَعي إتِرابَك ... يَغالي وما يِفيد إِعتابي وإِعتابَك

انتَظرَك تِعود يَالبِلقبُر نايِم ... يا أَغلى مَفقود بيك القلُب هايِم

مَشغولَه بَأَفكار ... وبِ روحي مِسمآر

بِليلِ أَظلَم دِفنتَك وإندِفن صَبري ... أُبو الحَملات آني وانكِسر ظَهري

أَنَه إِسهام المُصايِب يِغفَن إِبْصَدري ... إِذا زينَب تِوِن دَمعِ الحَسن يِجري

منْ يِبچي الحسين شيصبرَه شيصبرَه ... وين الصّبر وين ما تِنطفي الجَمرَه

منْ يآخِذ الثّار ... وبِ روحي مِسمآر

شارك هذا المحتوى
7٬857مشاهدة