يا رسول الله الدمع... من دم جريته

بويه مكسور الضلع ... يمك حنيته

إبكسر ضلعي... همل دمعي... من دم جريته

بنت النبي البضعه الطهر يم قبر والدها إعتنت

وصلت و من قبل العتب أم الحسن يمه بجت

صاحت يا بويه الواعدت توفي بوصيتك ما وفت

و صحبتك غيرها الطمع و داست الذمه و خالفت

بويه ظلموا بضعتك... بأمر الخليفه

تدري ضاعت أمتك ... بيد السقيفه

إبهذا وضعي... همل دمعي... من دم جريته

ما جنها ويه المصطفه تحجي و تعاتب فاطمه

ويه الأرض جنها إبحزن تحجي و تهل دمع السمه

جف إعله مدمعها اليصب و جف يمسح إبسيل الدمه

و إشلون حال المصطفه يسمع الزهره إتحشمه

صاحت إبلوعت قلب ... يالدللتني

ظلت إدموعي تصب ... يوم العفتني

إبهضم أدعي... همل دمعي... من دم جريته

جيت أحجي و أبدي و أشتكي و منتظره يالوالي إجواب

سل القلب يا والدي وي مدمعي اليهمل ذاب

إبخدي و ضلعي و مهجتي تارك أثر هضم الباب

و أنظر جنيني إعله الترب هذا أكلف و أمضه إصواب

صحت آه و ما رحم... حالي يوالي

ضلعي يا بويه إنهشم ... و الضيم حالي

طفوا شمعي... همل دمعي... من دم جريته

منعوني حته من الحزن رادوا قطع وناتي

و ببيت الأحزان إقعدت وحدي و أهل دمعاتي

إخبرني يا هادي البشر ما قربت ساعاتي

وياك أريدن جمعتي و مترمره إبحسراتي

جيت يمك و النظر... جاري إبمسيله

جيت محنية ظهر ... يمك دخيله

جيت أسعي... همل دمعي... من دم جريته

خليني يمك بالقبر أرحم إلي من إهمومي

و إهمومي كون إعله الزمن جا ليل أصبح يومي

أرد أدعي عالغصبوا فدك و سببوا سيل إدمومي

إبجاهك و جاهي و محنتي إبحرمة صلاتي و صومي

كون مأواه إبسقر ... كلمن ظلمني

إبيا ذنب ضلعي إنكسر... و يروح إبني

الحزن طبعي... همل دمعي... من دم جريته

يا بويه يا خير البشر جيتك إبهمي و نوحي

مهضومه و يهلن مثل مدمع إعيوني إجروحي

ما عندي رغبه إبدنيتي و عزانه منهن روحي

ماتت فرحتي من الزغر و طاحت إقبالي إصروحي

و عاشت إويايه المحن... بأول حياتي

خيبت آمالي الزمن ... و أنظر مماتي

جيت ألعي... همل دمعي... من دم جريته

يا بويه ليش أوصيتك بيها نسوها أصحابك

ما حسبوا يوم الحشر شيجاوبون إعتابك

يا ريت تنظر حالتي و تلفظ يبويه إترابك

إويانه النوايه إتغيرت يوم اللي حل إغيابك

سحقوا الذمه و نسوا ... كلما حجيته

هدموا كل شي و جفوا... صرح البنيته

ابحكم شرعي... همل دمعي... من دم جريته