حبيتك حب ما ينقاس ما حب غيرك يا عباس

من زغري أشوفك للوفه آيه قرآن الشرف عالعلقمي و مايه

أسولف عنك و عن مقبض الرايه و بعد عندك زلم للموت وفايه

لازم تعرف هاي الناس ما حب غيرك ي عباس

أول ما عرفتك عشت بضيوفك و جم معصوم جان إيقبل إجفوفك

يا هو القال يبن المرتضه إنعوفك عله إعناد الشماته إنروح و إنطوفك

ما أترك هذا الإحساس ما حب غيرك يا عباس

عشقتك يا بو فاضل من صدق نيه و جلمات العشق تبقه و تظل هيه

كل شيعة علي لجلك فدائيه تجيك إزحوف غصبن عالوهابيه

يا هيبه و يا رفعت راس ما حب غيرك يا عباس

يا أول حلم يمتلك وجداني عالي الراس طول العمر خلاني

محبوبي و يردد بإسمك إلساني و بيوم الحشر حاشاك تنساني

عاهدتك يا بو النوماس ما حب غيرك يا عباس

من شوقي و شعوري أوصف الحاله شفت قلبي إبهواك إنعقدت آماله

و اليخدم قمر عدنان هنياله يرتاح و يعيش امأمن إبجاله

لليوم إجفوفك تنباس ما حب غيرك يا عباس

حيرت الوصف يا صاحب الشاره صحنك ما فرغ من كثر زواره

كعبه إنت و تلوذ الناس بكتاره و بابك يا شهم يتلقه خطارك

حي زودك يا راعي الباس ما حب غيرك يا عباس

نذرت الخدمتك يا كافل إسنيني و بدت هاي الموده بينك و بيني

كرامات إشكثر شافت إلك عيني خليني أظل وياك خليني

لو تخد مني الأنفاس ما حب غيرك يا عباس

ذكرك صار شوقي و جنتي و دربي و إجيت أعلن إلك يا با الفضل حبي

مجنون إبهواك إمن الزغر قلبي لو ما إنت ما جان إعرفت ربي

مذبوح و دمك نبراس ما حب غيرك يا عباس