خويه حسين أنشد يا قبر ضمك يبن أمي عزيز و رايده أشتمك

يحسين الإخو للإخت قرة عين و آنه إبعازتك ظليت خويه حسين

أنشد عالقبر يبن أمي صاير وين عفتك من مشيت إمغسل إبدمك

إبدمك عفتك و لليسر بأحزاني و أتعبني البجي و ما شوف خلاني

وين إنت يخويه ووين ولياني بس إقبور أشاهد يا عزيز أمك

يمك رايده و عن حالي تنشدني و إبعينك يبعد إعيوني شاهدني

إمشيت إشلون خويه و شنهو ليردني أريد أقعد و أسولف هضمتي يمك

يمك أقعد إيسولف إلك نوحي يحسين و عليكم تنزف إجروحي

ودعتك عساني ودعت روحي و ريت اللحد ضمني قبل ميضمك

ميضمك يضمني اللحد من دونك و فدوه إنروح لك بس سالمه إعيونك

يحسين اليتامه إوياي يردونك أسمعها يخويه تلهج بإسمك

بإسمك تلهج الأيتام يبن أمي و تنحب عالطفل أم الطفل يمي

وحده اتصيح بويه ووحده يا عمي إشلون و حالهن يا خويه ميهمك