عمري كلمتين ...عاشق الحسين

هذا دمي كربلائي...عاشق الحسين

هذا صوتي من عرفته خل يسمعوني

لو يقطعوني إعله حبك ما يغيروني

قالوا إنجنيت و آنه راضي بجنوني

مدرسه العاشق يجيني يدرس إفنوني

مدرسة عقول...تقهر العذول

حته لو قالوا مرائي ...عاشق الحسين

الما يجن من هالمحبه هذا مو صاحي

هذا ما يعرف ينوح و يكره إنياحي

آنه حر ابن الرياحي وين ذباحي

قلبي مقفول إعله حبه و بيده مفتاحي

ما إله بديل...تركه مستحيل

فتوى أكتبها بدمائي...عاشق الحسين

آنه عابس في جنوني و إنت محبوبي

هذا سيفي هذا درعي و مزقت ثوبي

آنه من دم الشهاده أغسل إذنوبي

آنه عندي الموت ضحكه الجنه مطلوبي

دمي من يطوف...تركع السيوف

كاتب إبنحري فدائي...عاشق الحسين

آنه جون و آنه مسلم و الزمن شاهد

رايه رافعها حبيب و بيها متواعد

ويه أنصار العقيده ساعد إبساعد

آنه عندي حسين واحد و العمر واحد

واحد الحبيب...عني ما يغيب

إستمع آخر ندائي...عاشق الحسين

بالحرب آنه برير و سيفي بيميني

حسين قرآني و صلاتي كعبتي و ديني

آنه بالكلفه زهير و من يضاهيني

آنه أبيع الدنيه كلها حسين يكفيني

غيره ما أريد...يجري بالوريد

صرخه يعلنها ولائي...عاشق الحسين

قالوا إعليه مغالي يوم حبيتك

تيهت كل غالي و إنت ضميتك

لو أعرفك مو حقيقه آنه ما جيتك

إنت لو بآخر الدنيه أوصل البيتك

لا ذبح يفيد...عندي مو جديد

هذا من يوم إنتمائي...عاشق الحسين

إنت يا أجمل قصيده آنه أحملها

جم أعد زينب تقلي و آنه أعيد إلها

لو أمِل روحي و بنيني هاي ما ملها

مره أشمها مره أضمها مره أقبلها

قبلة العيون...و العشق جنون

من أليفي حته يائي...عاشق الحسين

هالعشق بس الله وحده يعلم أسراره

عاشق اليخدم شهور و ما وصل داره

هذا يلطم ذاك يطبر دمه يتجاره

ذاك من إبعيد يمشي ليله و إنهاره

يدفع الجفوف...يوصل الطفوف

هذا قطره من وفائي...عاشق الحسين