عباس إلك وصيه...عباس بالغاضريه

خويه الإبو وصاني و بهالوصيه أخبرك

قال العلم للعباس وقت الكلافه إينصرك

لا تمشي عن عيني إبعيد أضعف إذا ما أنظرك

يا خويه إلزم ظهري خليني ألزم ظهرك

عباس نهجم سويه...عباس بالغاضريه

إحنه الذي بقينه زينب أملها بينه

إحمل عله إيسار الجيش و آنه عليَّ إيمينه

حمله إشتهيت آنه إوياك نهجم سوه خلينه

سبعين ألف و إحنه إثنين نتقاسم بسبعينه

عباس إيدك بيديه ...عباس بالغاضريه

زينب شفت معصبها يعني تقلك وينك

آنه أنتخي بالعباس و إنت إنتخي بحسينك

فدوه إلك هالجفين بس المهم جفينك

إنت تغمض عيني و آنه أغمض عينك

عباس ما عاف أخيّه...عباس بالغاضريه

خويه الإخو وقت الضيج بس الإخو مطلوبه

و العنده مثلك عباس محد يقرب صوبه

بوجودك ووجودي زينب تظل مهيوبه

سكنه تنادي عمي من العطش مصيوبه

عباس نادت رقيه...عباس بالغاضريه

كل شي و لا إنت إتروح وحدي أظل بين الناس

لحظه إذا عني إتغيب أشتاق إلك يا عباس

هذا الوفه الما موجود بالخوه إنت المقياس

واحد لجن شفتك جيش يا خويه يا رفعت راس

عباس بس إنت ليه...عباس بالغاضريه

يا با الفضل ودعني أشعر بعد ما أشوفك

إنت تقبل نحري و آنه أقبل إجفوفك

و إشبقني شبقت ملهوف و إنثر عليَّ إحروفك

لو بيدي ما قلت لك روح غالي و أبد ما عوفك

عباس هجرك منيه ...عباس بالغاضريه

للمشرعه من إتروح إذكرني لو شفت الماي

إشرب هنيئاً عباس و إتركني آنه إويه إضماي

كل ظنك إتجيب الماي يمي و تشربه وياي

هذا الأبد ما يحصل ما تحصل بإيدك هاي

عباس يصعب عليه...عباس بالغاضريه

ياللي رحت الله وياك لازم توافي إوعودك

أدري بعد ما ترجع ياللي إبذلة مجهودك

لازم تعذرك زينب يوم التشاهد جودك

عالمشرعه الرايه إتطيح لمن تطيح إزنودك

عباس أعظم رزيه...عباس بالغاضريه

إذكرني خويه يحسين لو حشمت أسمعك

محني الظهر أوصل ليك يصعب عليّ أودعك

يصعب عليَّ التوديع دمعي جره وي دمعك

يالمستحي من إسكينه للخيمه ما أرجعك

عباس منتظره جيه ...عباس بالغاضريه

يا روحي نوحي العباس يا دمعه هلي هلي

رايد أقبلك بس وين و إمنين أشمك قلي

ما ينقطع فيض إدماك حاجيني يا بعد أهلي

من شفتك ابهذا الحال يا خويه ما ترجع لي

عباس عفتك رميه ...عباس بالغاضريه