يعباس من علي هالرايه يعباس بإسمك إموصايه

إجه اليوم البيه أشوف أفعالك يكفال و أستريح إبجالك

يزعلان و الزعل يحلالك يرجفون من يمر إخيالك

يعباس و الوعود إحجايه

يخو حسين يالله شد إحزامك و الجيوش خل تفر جدامك

و الأبطال خل تبوس أجدامك و السيوف تركع الصمصامك

يعباس قبلة الوفايه

يمغوار جن علي إبحملاتك يبركان ترهب إبخطواتك

يبو حسين يا علي إبضرباتك يخافون من جمر نظراتك

يعباس هيبتي و رجوايه

يحماي أفتخر بوجودك يعباس و النهر مقصودك

يقولون فِنه يوصل جودك يغدروك إحذر إعله إزنودك

يعباس و إعله المسنايه

يعباس معصبي شديته باليمين و بقصد خليته

إذا طاح زندك و ضميته عذرناك و الوعد وفيته

يعباس عالفرات و مايه

يعباس إزعل و راويهم يصولون و إنت صول إعليهم

يبو السيف سيفك إيبجيهم و الحسين يبرز الباقيهم

يعباس من يظل إويايه

يمن شال كربله بذراعه يعباس غيرتك فزاعه

يسفان ما يطيح إشراعه يبو الموت خل تقوم الساعه

يعباس خل ترف الرايه

يعباس و الحساب إبسيفك يبو الثار إنت تاخذ حيفك

يكرار و القياده إبكيفك عرفانك و الحرايب كيفك

يعباس نظرتك رمايه