ويه حسين... هالليله ويه حسين

ليلة دمع و أحزان بالغاضريه

بين العقيله و بين ابن الزجيه

خلينه بس هالليل نقعد سويه

آنه أبجي خويه إعليك و إبجي عليه

ليل إوداع ...يروي القاع

دمع العين ...هالليله ويه حسين

هاي العساكر ليش جرت شبه سيل

يا ابن أمي كل الخوف من هجمت الخيل

زينب يخويه إتشوف من بعدك الويل

بالله يا ليل الآه طول بعد ليل

ليل إهموم ...ما معلوم

باجر وين ...هالليله ويه حسين

قبل المغيب إتغيب يا زينب أرواح

يا خويه لا تبجين ما يرجع الراح

راعي العلم معذور لو عالنهر طاح

روس إخوتج يا حيف ترفعها الرماح

و إتحشمين ...و إتنظرين

عالجفين ... هالليله ويه حسين

سكنه و رقيه إشلون يا خويه بيهن

هاي يا إختي ما وصيج حني عليهن

لو جسمي صار أوصال لا تراويهن

حته إذا مذبوح أنحب عليهن

ل_ي_ل الآه ...واوي_لاه

من البين ... هالليله ويه حسين

باجر يا خويه النار تحرق خيمنه

و من يوقع العباس يوقع علمنه

و بكربله إتشوفين ذبحت زلمنه

يا زينب يسلبون باجر حرمنه

غدر الناس...و العباس

أجيبه من إنين... هالليله ويه حسين

باجر علي لو طاح أتمدد إوياه

و المثلي صعبه إينوح و إتشاهد إعداه

ضامي و أفكر بيه من يذكر إضماه

عينه إعله جاري الماي وشقد تمناه

ها يا روح...و المجروح

رد بثنين... هالليله ويه حسين

باجر رضيعي إيريد يتروه جبده

يا زينب و يا حيف مذبوح أرده

عينه تظل عالماي مشبوحه مده

حسباله دمه السال ماي و تبده

و بلا ماي...جبته إوياي

بمصابين ... هالليله ويه حسين

باجر نزف جسام للحومه يختي

و من يوقع إعله القاع توقع مهجتي

باجر مصاب إيصير بيه ما سمعتي

لا مثله صار إو دار لا مثله شفتي

خويه إنشوف...ضرب إجفوف

عالخدين... هالليله ويه حسين

باجر رقيه إشلون من يسلبوها

و إعله المتن بالصوت من يضربوها

يا رمح تنظر ليه بيه راس أبوها

طفله و بلا عباس ما يهابوها

تبقه إتلوع...و المفجوع

بيه نارين ... هالليله ويه حسين