ليش... ما شافت إعيوني الفرح

يوم العرس قلبي إنجرح... ليش

يبني... يغالي حنتك ظلت بديه

يبني ... بعد هيهات ما نلتم سويه

يبني... أشوفك وين يالمبعد عليه

يبني ... أراويك الزمان إشسوه بيه

ليش ... موج الحزن يبني طفح

يوم العرس قلبي إنجرح... ليش

يمّه ... عرفنه المات إبنها إتزور قبره

يمّه ... دمعها إعله القبر يجري و تنثره

يمّه ... و أنا قبرك يغالي وين أدوره

يمّه ... أهيم و أنهضم لمن أذكره

ليش... و إبيا ذنب إبني إذبح

يوم العرس قلبي إنجرح... ليش

وينك... ييمه من أفز نص الليالي

وينك ... تعال و شوفني و إبجي إعله حالي

وينك ... و أباوع عن يميني و عن شمالي

وينك ... و لو بس بالحلم تحضر يغالي

ليش... وحدي و زماني ما نصح

يوم العرس قلبي إنجرح... ليش

روحي... يجاسم وي وداعك ودعتها

روحي... إذا مو إنت يمي ما ردتها

روحي... ييمه إبسيف هجرك قطعتها

روحي... تعال و شوفها يالعذبتها

ليش... دم و دمع عيني سفح

يوم العرس قلبي إنجرح... ليش

جاسم... ييمه بالحلم إسأل عله أمك

جاسم ... يبعد أهلي أريد الصدري أضمك

جاسم... ييمه لو جبل ما شال همك

جاسم... جنت أشتاق أشمك و آنه يمك

ليش... عمر الورد عمرك صبح

يوم العرس قلبي إنجرح... ليش

ويلي... ييمه و ساعة إمصابك شفتها

ويلي... لجن ساعة فرح ما جربتها

ويلي... يجاسم جلمة إشلونك ردتها

ويلي ... ضعيفه أمك يغالي و شيبتها

ليش... بس همك و هجرك وضح

يوم العرس قلبي إنجرح... ليش

يمته ... تسافر يالحزن و إتعود ليام

يمته ... يرد بيه الزمن و يرد لي جسام

يمته ... و أقول اللي يفارق جاسم إينام

يمته ... بعد و أنسه الهضم و إتروح الالام

ليش ... يا وسفه دهري ما سمح

يوم العرس قلبي إنجرح... ليش