و حقك لو بقيت بآخر أيام

أقوم الخدمتك و أتحزم إحزام

قبل جان اليخدمك حكمه إعدام

تحديت و صحت خدام خدام

شرفتني إمحبتك راسي عالي

خدمة و ما يهمني إشقالت الناس

أنا عندي الحسين و عندي عباس

صرت صوت الجرح يالعندك إحساس

ألف موته أموت و ما أطخ راس

لا أزال إبحضرتك راسي عالي

إذا تطردني وين أنطي الوجه وين

تقول الناس هذا العافه الحسين

تظل دوم إعله بابك تدمع العين

بعد محبوب مثلك يحصل إمنين

لا تذبني إمروتك راسي عالي

يشوفوني ملك و أعرف يغارون

يحسدوني عله الخدمه و يلومون

و اجيلك و أشتكي من اليقولون

و إذا ترضى عليّ خلهم يزعلون

يا حسين إبشيمتك راسي عالي

طريق الموت محد يعتني ليه

و أصيحن يا حسين و أركض إعليه

عشق و الناس كلها إتعجبت بيه

طريقك لو يصير إسيوف أمشيه

ياللي روحي إتمنتك راسي عالي

صحيح اللي يخدمك ترفع إسمه

أمير إيصير و الوادم تخدمه

تبوس الناس حته إتراب جدمه

شمس و الما يشوف الشمس أعمه

بيدي رافع رايتك راسي عالي

إذا مو مثلي خادم صار إبني

أرفضه و لا أحبه و لا يحبني

لأن أدري إذا أكبر يذبني

أريده كون بالخدمه إيغلبني

حته أصير بهيبتك راسي عالي