لو ناوي يحسين إتروح...هاك إخذ وياك الروح

يبني إلمن إتريد السفر...يالقاطع إدروب الخطر

هاك إخذ وياك الروح

نوق الموادع نوخت من ودع الليل البدر

و لاح الدمع لاح الحزن من لاحت إخيوط الفجر

و إهناك لن صوت الوفه جم دوب أظل أجرع صبر

يا دهر ويه أهل الكرم ما بطلت طبع الغدر

يا دهر ويه الأشراف...خل عندك إيصير إنصاف

ويلاه منك يا دهر...يالقاطع إدروب الخطر

هاك إخذ وياك الروح

هالصوت صوت أم الوفه أم البنين أم عباس

صاحت يبن خير الوره يا تاج هيبه إعله الراس

يحسين يبن الطاهره و ابن الوصي خير الناس

يا هو الينعش ريتي فقدك يخمد الأنفاس

يبن البتول أمشي إوياك...و اعليه يصعب فرقاك

لو رحت أموت من القهر...يالقاطع إدروب الخطر

هاك إخذ وياك الروح

يحسين عندي إمودعك والدك حماي الحمه

و الأمك إشعندي عذر و إنت وديعة فاطمه

يوليدي لو عني رحت حيلي العليه إتهدمه

ما تقطع إعيوني الدمع لمن يوافيها العمه

أتمنه ما عندي أنظار...و لا شفت ضعنك من سار

و لا يبقه مشبوح النظر...يالقاطع إدروب الخطر

هاك إخذ وياك الروح

صاحت يسبع القنطره يا قمر هاشم يا شهم

أمك إبيوم الجابتك يا با الفضل شافت حلم

إنت جفيل العايله و إبهالخبر عندك علم

ساقي العطاشه إبكربله من إخيالك إتخاف الزلم

و حان الوعد يا عباس...إشرايك يراعي النوماس

ما ظن تقصر يا قمر...يالقاطع إدروب الخطر

هاك إخذ وياك الروح

أمك يوفاي العهد ما أنصف إوياها الزمن

بعيوني يوليدي شفت جرح الوصي و جبد الحسن

و الأكلف إعليه و أشد لمن حده حادي الضعن

طلعت الروح من الجسد حين الطلعتوا من الوطن

يوليدي يا نور العين ...ودعت بحماك حسين

و إنت الإله إحزام الظهر...يالقاطع إدروب الخطر

هاك إخذ وياك الروح

سلوتي و سباح القلب سلمته يبني إبيمنتك

زينب وديعة حيدره هاي العقيله الربتك

قابلت مهدك من زغر و ما غفت ساعه و عافتك

قلت إلها قومي إبشيمتي و زينب يخوها إبشيمتك

يبني الدرب خاف إبعيد...تتفقد إختك شتريد

باريها يا راعي الفخر...يالقاطع إدروب الخطر

هاك إخذ وياك الروح