شنهو الجره و الصار...بعدك عله العتره

نسأل سؤال إمن الرسول الأكرم...شنهو السبب حكم القضاء إتحتم

كل واحد امن العتره من عقب الهم...يقضي العمر لو بالذبح لو بالسم

هذا الأمر معلوم...و بعترتك محتوم

لو ينغدر مسموم ...لو ينقطع نحره

عندك خبر يالهادي بس شخصك غاب...شنهو الجره عالعتره من عظم مصاب

عندك علم أول ضحايه الأصحاب...ذاك الجنين اللي سقط خلف الباب

أدري الفكر مذهول...يالمصطفه شنقول

محسن وقع مجتول...من عصروا الزهره

عن الوديعه تحجي يا والدها...و إعله المصيبه ربك إيساعدها

كثره الرجال الحاوطتها إبحدها...بين اليجرها و السطرها إبخدها

و حيدر علي معروف...ليث العرب موصوف

واقف يصد و يشوف...بعيونه هالسطره

و عند الوصي حيدر وصل تالي الدور...و أدري يبو العتره تعرف المستور

أحقاد مدفونه و عدوات و جور...خلت علي و هو إبصلاته مغدور

راس الوصي إتخذم ...إبضربة ابن ملجم

و إتخضب امن الدم...لو تقدر إتنظره

و تالي السؤال اليرتفع بالونه ...عن الحسن سيد شباب الجنه

عندك خبر جبده تقطع منه ...و تدري إشجره يالهادي ساعة دفنه

إسمع يبو الأكرام...نعشه إنرمه بسهام

و مرتاحت الظلام...الحين إنهدمت قبره

و تسأل عن حسينك دموع التجري...كلما أنوح و أبجي و ألطم صدري

تدري بخبر نحره الشمر بيه يفري...تدري بخبر أضلاعه لو ما تدري

ما خبرك جبريل...إبنك بلا تغسيل

و لمن إجت له الخيل...داست على صدره