أحوم الليل أدور اعليك و أرويك إبدمع عيني

آه يبني إنذبح عطشان و إسهام الغدر ترويه

آنه أمه و أناغي له و أشوفه يرفس ابرجليه

شبه طير اعله صدر حسين يرفرف منذبح بيديه

دمه امن النحر يجري يويلي و السهم ماديه

و آنه اللي عماني النوح و مني راح ضي عيني

آه يبني إبظلام الليل أقضي الليل سهرانه

أعد إنجوم و أتذكر و أهيم إبلوعة أحزانه

عيني ما يجيها النوم و وروحي إتريدك إهنانه

تجيني صورتك كل ساع تروح و أبقه لهفانه

يبني و ذاب حيلي اعليك و ذابت شمعة إسنيني

يعبدالله المهد خالي موحش ظل عقب عيناك

أهزن بيك و أناغي لك تدري اشقد يسرني إنداك

تعيش ابخاطري ذكراك يبني شلون بيه اوياك

جنك عايش اويايه لا تنساني و لا أنساك

لا طيفك يفارقني ولا الحسره تجافيني

يبني و يا نسيم الهاب يغصن و أقعد ابفيه

يا حلم و يمر عالبال كل سا يلفي طاريه

يا نغمة حزن و إدموع ظلت بالقلب حيه

تعيش اوياي ليل إنهار ما خلت عقل بيه

إنت سلوتي الحلوه لتروح و تخليني

يبني اشقد أفز بالنوم يدوي إبمسمعي إسمك

أقومن و أركض المهدك بلكن ساعه أشوفنك

تناغيني و أناغي لك و أروي الروح من شمك

لاجن خابت إظنوني أرد إردود من يمك

لا موجود أشوفنك و لا طيفك يسليني