رسول الرحمه يا جدنه...لون حاضر تشاهدنه

عقب عيناك...ولتنه إعداك ...لون حاضر تشاهدنه

يا من بالكتاب و عترته وصيت...تجازيك إعله تعبك أمتك ظنيت

لكن بالعداوه و الجفه إتجازيت...تشوف إشجره إعله أهلك يا محمد ريت

تناخت أمتك ضدنه...إبسفك دمنه تهددنه

إبحقد و إرهاب...ولتنه إذياب ...لون حاضر تشاهدنه

بعدك عله إفراش الأجل يالمختار...و بدار السقيفه إجتمعت الأشرار

و بحجة الشوره لو دريت إشصار...نكروا حق وصيك حيدر الكرار

بعد ما ظل أمل عندنه...و جليس الدار والدنه

إشوسع صدره...و حمل صبره ...لون حاضر تشاهدنه

و البضعه الحزينه و الدمع سجاب...من داعت إبحق حيدر إمن الأصحاب

قصدوا دارها و دفعوا عليها الباب...و المحسن سقط و الضلع منها إنصاب

الحشر و إحسابه موعدنه...كسر أمنه شاهدنه

يوم الباب ...و المحراب ...لون حاضر تشاهدنه

يجدنه من السبي الموطنه ردينه ...و القبرك إبحسرتنه تعنينه

نحجي لك يجدنه بالجره إعلينه ...حرم و أيتام و إبلا زلم ظلينه

لون رايد يناشدنه ...عذاب إشكثر شاهدنه

حرم و أيتام...إبحزن و آلالام ...لون حاضر تشاهدنه

يجدنه عفنه أهلنه جثث عالغبره ...و مشينه إعله الهزل بالدمع و الحسره

و حسينك يجدنه هشموا صدره ...و راسه إعله الرمح و يصب دمه نحره

يتامه و من يساعدنه ...و عله الهزل يصعدنه

و عليل إينوح...إبقلب مجروح ...لون حاضر تشاهدنه

ودونه سبايه و الطريق إبعيد...و يا قلب البعد من الونين إيهيد

و إصواب الهضمنه إصواب حيل إمجيد...يوم اللي نظر لينه إبشماته إيزيد

إبعين الشامت إيصدنه...و يشوف الحبل قيدنه

و قدر يفتر...و شتم حيدر ...لون حاضر تشاهدنه