إبفقدك آنه إمحيره...و دمعي لمصابك جره

من غبت ينور إعيوني

بعدك عله المغتسل يالمصطفه

عقبك يبويه عله الدنيه العفه

و شفت الصحابه كلها متكاتفه

كلها غدت عالغدر متحالفه

و آنه بنتك فاطمه إيعرفوني

إبلحظه وحده إتغيرت...و للخيانه قررت

من غبت ينور إعيوني

وصيتها يا لإبو تمشي عدل

الأصحاب من بعدك يسيد الرسل

و لجل المطامع ما ردت تنخذل

خير إلها ردته و ما ردتها تذل

و إبوصيتك قررت يحموني

لجن سارت عالغدر...و إنت وصيت إشكثر

من غبت ينور إعيوني

غيرت كل ذاك الحجي يا عجب

غرها طمعها و صار هذا السبب

و عافت كلامك يالنبي و التعب

هضموني يا بويه و حقي إنغصب

ما رعوا حالك و لا راعوني

و يعرفوني فاطمه ...و قدري من رب السمه

من غبت ينور إعيوني

يا ريت حي و تنظر الحالتي

الفقدك أنوح و بس تهل دمعتي

و قلبي إنجرح من شوغتي و محنتي

و إنغصب حقي و من يحل شدتي

و إعتنوا داري العده و صابوني

و ضلعي يا بويه إنكسر...و حقي من عندي إنغدر

من غبت ينور إعيوني

الداري إعتنوني يالأبو إبيا وضع

حالي إنضهد و إنكسر مني الضلع

و محسن وقع يا بويه و أجري الدمع

أحجي لك الموقف و لو مطلع

و أسقطوا حملي العده و هضموني

و صحت يا حامي الحمه ...ضلعي منه امألمه

من غبت ينور إعيوني

شتريد أخبرك بعد عن أمتك

عقدة سقيفه و أبد ما راعتك

إنقلبت ابسرعه يالإبو و عافتك

و غصبوا إحقوق المرتضه و بضعتك

ضيم يا بويه و مجن راوني

و الفدك من غصبته...و علي إمجتف أخذته

من غبت ينور إعيوني

طلعوا من الدار فارس مضر

و آنه إطلعت خلفه و أهل النظر

رد الزنيم و عله عيني سطر

إعليهم قلت إشهد يسيد البشر

هالشكل هاي أمتك جازوني

ما رحم حالي الزمن ...و شاهدت ضيم و محن

من غبت ينور إعيوني