يا بويه لو تدري إشصار يا بويه ...لمن رحت يالمختار يا بويه

إبحسرة قلب خلوني...و العده ما رحموني...لمن رحت يالمختار يا بويه

أبين لك يبويه ساعة الفرقه ...و أدري إوياك أبداً ما تصح ملقه

صابوني و بعدني بأول الحرقه ...و حقي من ينوح إقليبي من حقه

يتمني دهري الغدار يا بويه ...و إحملت ضيم و أخطار يا بويه

و بفرقتك هضموني...و العده ما رحموني...لمن رحت يالمختار يا بويه

إشكثر وصيت بالزهره يداروها...و من كل نايبه عقبك يحفظوها

لاجن للصحابه ابعكس هضموها...و من إتريد تبجي العده إيمنعوها

إتعرفوني أم الأطهار يا بويه ...بالمحشر إشتنطي اعذار يا بويه

و بشرهم إتولوني...و العده ما رحموني...لمن رحت يالمختار يا بويه

خلف الباب أصيح إبصوت أنا الزهره...و ما فاد الحجي و خلوني متحيره

الباب إندفعت و مردتني العصره...و طاح المحسن إبكتري عله الغبره

و إلتمت إبباب الدار يا بويه ...و بالحقد وجوها إبنار يا بويه

و آنه أصرخ إيسمعوني...و العده ما رحموني...لمن رحت يالمختار يا بويه

بالوقعه صحت يا فضه شيليني...ضلعي منكسر و إبهيده سنديني

يفضه إنصاب صدري سكني إونيني...و الأكثر سقوط الحمل ماذيني

و إبمثل هضمي ما صار يا بويه ...و الصدر صابه المسمار يا بويه

إبقسوة قلب عصروني...و العده ما رحموني...لمن رحت يالمختار يا بويه

فقدك يالإبو خلاني محتاره ...شيسكن ونيني و دمعي يتجاره

شعتب عالزمان و محنة أقداره...عقب عودي يتيمه و موحشه داره

و الزمن بيَّ يندار...و توليني وادم أشرار

يدرون و يعرفوني...و العده ما رحموني...لمن رحت يالمختار يا بويه

كل هاي المحن يا بويه ريت اتشوف...من الدار أخذوا حيدره مجتوف

وراه إطلعت و بدلالي رهبه وخوف...و العدوان متجمعه إعلينه إصفوف

وشبيده حماي الجار يا بويه...إمجتف تشوف الكرار يا بويه

و عالعين من سطروني...و العده ما رحموني...لمن رحت يالمختار يا بويه