قربت الساعه و قرب وعد الصباح خل تجيب إشتملك إسيوف و رماح

هذا عزائيل قباض الأرواح و بيمينه أرواحها و حل الممات

هذا بو الحملات قطاع الرقاب نفخ بالصور و نزل بيها العذاب

جبل جدمه من يثبته إعله الرجاب لو لكد مهره يعقب العاديات

هذا عباس المجرب بالوفه خل يشوفه البالشدد مو شايفه

إيطول عنه الحجي و مو بس هالصفه إبو فاضل مكور الكل الصفات

الينتخي بعباس ما يرجع ذليل و غيره محد يعدل الحمل الثقيل

صاحب الشارات أبو إدراع الطويل شارته بالإيد و أبداً ما تبات

هدر صوته و نزل ميدان الحرب كور الجنحين ذبها إعله القلب

تيهت ما تندل امن انين الدرب إمن إنين تشرد حاصر إعليها الجهات

حاشه تقبل غيرته صاحب الجود تنهضم زينب و هو بالوجود

الماي راح إيجيبه واعدها و يعود و النعم صاحت له يا طيب الذات

جم طفل من العطش عنده إشتكه حقه يغضب لو نزل للمعركه

الماي صار إبخدمته و إتملكه و رايته الركزها رفت عالفرات

للإخوه هاي أكبر موعضه الماي بارد و القلب يسعر غضه

مله إجفوفه و ليش دبه و ما رضه يشرب و يتهنه من ماي الحيات

موقف و ينراد له مخلص صلب و الصلب عباس ما ضاق العذب

ذكر جبد حسين أخيه الملتهب بالخيم تنتظر جيته الطاهرات

موقف آخر عن صموده ينعرض اليوقع إمن المهر يتلقه الأرض

بالجفوف إيخاف حيله ينبهض إشلون قلي بالجفوفه إمقطعات

جم سهم نابت إبقلبه و ما طلع و من ألمهن يحس دلاله إنقطع

إمن المهر عباس يوم اللي وقع إتوجه بسهام البقلبه إمركزات

مثل هذا اليوم كون إحنه نطوف إبمرقد العباس اللي ايحب الضيوف

إنقله جا ترضه يمقطوع الجفوف إحنه غربه و الوطن بإيدي الطغات

بالسده إعلينه أظن عندك علم إشلون جا تقبل يذباح الزلم

قبتك يبن الصميده تنهدم و شيعتك صبت عليها نايبات