حسين يا عباس يم راسك وقف ينحب و ظهره إعله فقداك إنعطف

آه لمن وقف يم راسك حسين و شاف قطع إيسارك و بري اليمين

أكظم و سالت على وجنته العين دمع من إسويد دلاله هدف

يا عضيدي النوم إلك ماله محل نايم و هاليوم يومك يا فحل

يا عضيدي إشلون ترضه إوحيد أظل بين عدوانك و هم سبعين ألف

يا عضيدي النوم إلك ما ينتسب و ما على غيرك عليك الينعتب

واعدت بالماي سكنه و ليه ترب وين جانه و عادك الما تنخلف

يا عضيدي إعيونك إشلون إتغمض و لك بالطف خيم مشحونه عرض

إبغير سيفك يا شهم ما تنخفض و سورها لخدورها و إلها سجف

يا عضيدي إشلون إلك عين و تنام و خيل عدوانك دنت يم الخيام

يا ذخر زينب يعفها يضرغام ما تأمنها القلب منها رجف

من طحت يا عمد صيواني إنطوه و إنكسر ظهري و ركن حيلي دوه

و مشعل إفراقك حدر ضلعي دوه و ناب فقدك رعه امن المهجه نصف

تدري شيقولون يعضيدي الكفر ظل فريد حسين ما عنده نصر

جان إخوه عباس ضامد بيه ذخر راح من إيده و عليه حيله إنعطف

تدري شيقولون يعضيدي الأنذال عقب إخوه عباس عز حسين ذال

شابحات الدربك إعيون الأطفال تنتظر جودك الما بحره يجف