يم قبرك يا نور اعيوني...ناخت يا عباس إضعوني

جنت أتأمل تتلقاني...جيت أشجي لك من أحزاني..يم قبرك يا نور اعيوني

من إنين يا عباس لو ردت أبدي...قلبي كله إجروح و بالهضم يدي

يالجبتني إوياك من وطن جدي...رحت و الجتال بالضعن يحدي

فوق الهزل من مشوني...خابت يا رجواي إضنوني

من يفقدني و من يرعاني...جيت أشكي لك من أحزاني

و عالنهر عفتك إمقطعه إجفوفك...و خويه لو بيدي جان ما عوفك

إشلون إليَّ إعيون إمخضب إتشوفك...و هيَّ ما شافت مثل معروفك

إجفوفك قطعوها و هضموني...و منك يالجافل حرموني

لا أنساك و لا تنساني...جيت أشكي لك من أحزاني

خويه شحجي لك حرت يا عباس...إمن الهضم شيب القلب قبل الراس

إعليه تتفرج يا جفيلي الناس...ناس ما عدها ذره من إحساس

بت حيدر آنه إيعرفوني...ليش الوادم ما حشموني

طحت إبشده عقب إخواني...جيت أشكي لك من أحزاني

و الهدم حيلي خويه درب الشام...الدرب قضيته إبحسره و بالالام

و جفني يا خويه ما طبق لا نام...أحرس العيله و أفقد الأيتام

يا عمه إبلوعه إينادوني...و عنك يا خويه إينشدوني

و هذا الموقف حيل آذاني...جيت أشكي لك من أحزاني

و زينب آنه إختك و هالأمل ما جان...إمجتفه خويه أدخل إبديوان

إيزيد متشمت إبجتلتك فرحان...إسمعته من شتّم داحي البيبان

عدوانك خويه إتولوني...يا راعي الغيره و شتموني

و طحت إبحيره يا ولياني...جيت أشكي لك من أحزاني

و بالطشت خويه شفت راس حسين ...ينظر إعليه و يهل دمع العين

و إنجسم قلبي إمن القهر نصين...صحت يا عباس عني غايب وين

يا ريت إبلحدك دفنوني...قوم إنظر يا نور إعيوني

إبيا حال أرجع لرض أوطاني...جيت أشكي لك من أحزاني