لفيت امن اليسر بالدمع و الحسره أناشد عن يمين القمر و اليسره

مثل طير القطه اعله النهر قلبي ايحوم أريد أشكي جفيلي إشكثر شفت إهموم

صحت إنفض إترابك يا بو الغيره و قوم كسر قلبي يخويه قلت شيجبره

دقوم و شوف إختك ردت إبيا حال ما بين الحرم ممتحنه و الأطفال

و إخدودي حفرها دمعي الهمال و أيام السبي بأحوالي شمأثره

و خلف جم سهم بالقلب نشيانه و لبن إزياد مجتوفه أطب ديوانه

و إعليه يخويه إتطاول إلسانه متشمت يخويه و آنه متيسره

قلب إختك يخوها تنزف إجروحه و ما يقطع ونينه و حسرته و نوحه

راسك عالرمح و إعيوني إتشوفه و إنت الحال زينب إختك إتنظره

و راس حسين إخويه إيزيد من شافه و لن بيده العصه و يلعب عله إشفافه

و العله دقلي إشلون تتشافه و إبصدري يخويه إمكسره العبره

بوجودك جنت يالوالي مستوره و الرايه إعله راسي قبل منشوره

و الدار الزهيه القبل معموره أرد ليها و مصابي إشلون لو ذكره