آنه البتول الطاهره الظلموني...آنه الذي بالسم و الذبح فجعوني

يا شيعه عينوني...و بالدمع واسوني

آنه البتول الطاهره الظلموني

آنه يا شيعتي البضعه الطاهره الزهره الزجيه

و لدي سم و ذبح خلصوا و الأشد أثر عليه

إمصاب النحزت رقبته و جثته فوق الوطيه

من قبري هالليله إطلعت...و إبنوح قلبي إتقبعت

خل المسه إيلوح قلت...و أعتني للغاضريه

صاب المثلث جبدي ...ويه جبده

و الظهره و الظهري ...يشيعه إتعده

صابوه و صابوني...و بالدمع واسوني

آنه البتول الطاهره الظلموني

صحت وينه العنده دمعه وياي هالليله يكتها

مهجتي يا شيعه ذابت إمن السهام اللي رمتها

و الذي هدمت حيلي جثت حسين الشفتها

حين الوصلت المصرعه...و عاينت جثته إمقطعه

و إسيوف هاي الفاجعه ...إهروش قلبي قطعتها

يا شيعه مرمي... إعله القفه من شفته

قلبته و بطوله... نمت و إحضنته

و ناديت يعيوني...و بالدمع واسوني

آنه البتول الطاهره الظلموني

و إسمعت قلبي يقلي و قام يشغر من ونينه

قومي يا فاطمه الزهره نعتني الحامي الضعينه

عالقمر عباس ننشد عن يساره و عن يمينه

و نلقي الوفيه الصابره...أم البنين الطاهره

يم جسد سبع القنطره ...إتزيح سهم الصاب عينه

أم الوفه خل ...نقصد إنوافيها

و إعله الشباب... الأربعه إنعزيها

و إتصيح عزوني...و بالدمع واسوني

آنه البتول الطاهره الظلموني

قلبي يا شيعه حنين إشما طلب مني أطيعه

إشطلب هاي المره مني و طلبته كلفه يشيعه

إيقلي يم حسين قومي خل نناشد إبرضيعه

إبسادس شهر ليش إنفطم...و من شربة الماي إنحرم

و إبعيني من شفت السهم...ضاقت الدنيه الوسيعه

مهد الرضيع ...إبلوعتي إتعنيته

و إبضلعي المصوب... قمت هزيته

و إبذبحه ذبحوني...و بالدمع واسوني

آنه البتول الطاهره الظلموني

و إسمعت صوت العقيله إتحشم الوالي الصميده

بين أيتام و أرامل حايره و ظلت وحيده

علي حماي الدخيل إبكربله يحضر تريده

و إبحين سمعتني أحن ...ليه أعتنت أم الحزن

حضنتني و قامت تون...ونه جتاله و شديده

إتقلي إخوتي... راحوا و عافوني

ورمت ييمه ...من السياط إمتوني

مهضومه خلوني...و بالدمع واسوني