يودعوني يودعوني...هالليله يودعوني

باجر عني إيروحون ...ولياني و بيه إشلون

هالليله إيودعوني

ما نصف وكتي إوياي من زغري و الهاليوم

نكبه إعله نكبه إتصير ضيم و قهر و إهموم

بين الذبح خلصوا ولياني و المسموم

بعيوني بعيوني ما ظلت بعيوني

نشفت كل الدمعات...من حزني و الآهات

هالليله إيودعوني

أول جرح جتال صوب دليلي إصواب

ضلع أمي من كسروا و طبقوا إعليها الباب

و من وقع حامي الجار و إتيتم المحراب

يتموني يتموني... راحوا و يتموني

لا بويه و لا أمي...إلمن أشكي همي

هالليله إيودعوني

ما قصرت يالبين مني خدت شتريد

لا وطن لا وليان و درب المدنيه إبعيد

أتحسر إعله الراح و أصفج الإيد بإيد

إيعوفوني إيعوفوني... خواني إيعوفوني

لا عباس ولا حسين...باجر راح أصبح وين

هالليله إيودعوني

بس هالمسيه إوياك طول يا ليل البين

خليني أشبع شوف و أتوادع إويه حسين

صبح الكدر لو لاح أنطي الوجه لا وين

إيخلوني إيخلوني إبيا حاله إيخلوني

أحتار إبجمع إعيال...لو نشف دمع أطفال

هالليله إيودعوني

وين الوعد عباس و إعتاب ليّه إوياك

يالقلت قومي إوياي جفي إعله جف يمناك

تتركني بين أشرار و آنه الجنت بحماك

ايهضموني ايهضموني يا خويه ايهضموني

زينب يا بو النوماس...تتغرب يا عباس

هالليله إيودعوني

منك شفت لوعات يا دهري يا خوان

للطف جبتني إتريد تفجعني بالوليان

و خدري و دلالي إيضيع و أتمحن إبرضعان

يردوني يردوني أرويهم يردوني

أطفال إشلون إتهيد ...و الماي إعليه إبعيد

هالليله إيودعوني