عالغبره زلمنه ...و النار إبخيمنه

يحيدر صبري ودعته...و إخويه إعله الترب عفته ...و النار إبخيمنه

إبظلام الليل زينب جمعت العيله ...و صاحت عند علي هالعايله إدخيله

علي راحت زلمنه و ما بقت حيله...و يتامه حسين بالبر باتوا الليله

نسوان و يتامه ...تجويها الملامه

ضيم المحنه عاشرته...و إخويه إعله الترب عفته ...و النار إبخيمنه

غريبه و ليل و إدموع و ذبح وليان...و مركز صار قلبي و مقصد الأحزان

ألِم أيتام إبويه لو ألِم نسوان ...أخمد نار تلهب بالقلب نيران

مهضومه و غريبه ...و أحمل جم مصيبه

إمصاب العاشر إحملته...و إخويه إعله الترب عفته ...و النار إبخيمنه

حرم و أيتام عندي و جم قلب مفجوع...بس صوت المناحه إبكربله مسموع

يتيم إينوح و إبكتره يتيم إيلوع...صبح بينه الدرب يا با الحسن مقطوع

و من لوعة قلبنه...ضيعنه دربنه

يلفيني الأجل ردته ...و إخويه إعله الترب عفته ...و النار إبخيمنه

علي إبعيني شفت وليان مذبوحه...و شفت رايه و قمر عالشاطي مطروحه

و رضيع حسين شفته إينازع إبروحه...و آنه إشجم جرح بالروح مجروحه

م_ن م_اي ال_م_دام_ع...روي_ت ال_م_ص_ارع

و بيدي حسين قلبته...و إخويه إعله الترب عفته ...و النار إبخيمنه

و على دربك يحيدر صرت أدير العين...أصب دمعه إعله دمعه و أومي بالجفين

لا واحد إجاني و ناشد إنتي من إنين...شصبر يا علي قلي الصبر لا وين

يا حيدر تراني...محتاره إبزماني

ليل الغربه واطنته...و إخويه إعله الترب عفته ...و النار إبخيمنه

ناديت إبدمع و أهل الوفه تسمع...يريت الليل طال و لا فجر يطلع

يركبونه الهزل و إنمر عله المصرع...و أشوف حسين دامي إعله الثره إمقطع

و من يطلع صبحنه...يتوسع جرحنه

يريت إبعيني ما شفته ...و إخويه إعله الترب عفته ...و النار إبخيمنه