بدموعي... حنيتك حنيتك

و للحومه ...زفيتك زفيتك

إدموع آلالام ...يا جسام يا جسام

يبني هذا اليوم يومك قوم شمر عن ذراعك

الحومه تتنطر زفافك قوم يالحلوه طباعك

قصرت لك ثوب عودك بين الدينك دفاعك

مو مثل غيرك أريدن زفتك تصبح وداعك

الهالساعه... ربيتك ربيتك

إتوافيني... تانيتك تانيتك

الها الأيام...يا جسام يا جسام

إوليدي جم لوعه و مصيبه إتحملت و آنه الحزينه

و جم رزيه و جم فجيعه شاهدت روحي الحنينه

و كل مصاب اللي يمرنه إشما كبر يسهل علينه

بس مصاب الغاضريه هيج الأحزان بينه

جم شمعه... طفوها طفوها

و جم حره ...هضموها هضموها

هالظلام ...يا جسام يا جسام

يبني وادي الغاضريه لوع إقلوب الفواطم

جم جسم أصبح رميه إموذر إبحد الصوارم

إمغسل إبدم الشهاده إتغيرت منه المعالم

و ما بقت بالعين فرحه بس أمل عرسك يجاسم

يوليدي ...عماتك عماتك

تبجي إويه ...شمعاتك شمعاتك

بدري التام ...يا جسام يا جسام

تدري و الأكثر فجعني حالت حسين و غربته

وحده ظل وسط المعاره إمصرعه أهله و صحبته

و عودك الها اليوم رادك الكربله و تعرف طلبته

وصه لو عمك تحير تنزل إتفرج كربته

تتعنه... للحومه للحومه

و إتعينه ...بهمومه بهمومه

شد إحزام ...يا جسام يا جسام

شمعة الشبان جاسم إسترخص إيطب للمعاره

عمه بدموعه يودعه و بالقلب جانون ناره

و جاسم إشمحله طلعته إتوسط الحومه إبجداره

يرتجز و إينادي بيهم بس لبو اليمه الإماره

عيني إعله ...عدوانك عدوانك

و عيني إعله ...صيوانك صيوانك

لا تنضام ...يا جسام يا جسام

حسين ابو اليمه أميري و ما خلق ربنه نظيره

و مهجة الهادي و سروره نلتزم دربه و مسيره

فاطمه أمه الزجيه العالم إبجفها تديره

و حيدر الكرار عودك هاشمي و نعم العشيره

و الوالي... بخيامه بخيامه

تتوقد ...آلامه آلامه

إيرد إسهام ...يا جسام يا جسام

وسفه جاسم ما تهنه و رمله بمصابه إفجعوها

و هامته إبدم الشهاده إبلا ذنب من خضبوها

و شمعة الجانت مضيه إبوسطت الحومه طفوها

و الترب أصبح خضابه و كربله إبدمه سقوها

يويلي ...لمصابك لمصابك

يمحنه... بخضابك بخضابك

إبدم الهام ...يا جسام يا جسام