هالمبعوث حسين إختاره ...وفاي و شاعت أخباره

قاصد للكوفه إيبشرها...و بالراي العنده إيخبرها...وفاي و شاعت أخباره

لحسين إمن أشراف الكوفه حين الوصلت ألف إكتاب...ننشدها و خلي إتجاوبنه شتقول أصحاب الألباب

مسلم ليش حسين إختاره خلها اتوضح إلنه الأسباب...باللوح امثبت مبعوثه لو عنده بالهلحكمه إحساب

من سلم مسلم أسراره...يعرف إيمانه و إصراره

بالموت الناس إيحذرها...و بالراي العنده إيخبرها...وفاي و شاعت أخباره

خل نقره اشتكتبت عن مسلم وشقالت أهل الأقلام ...راح إبواجب أشرف واجب ينقذ الأمه من الظلام

يامر بالمعروف و ينهى عن المنكر و الأصنام ...و الحكمه السجلها إبدمه خل ترويها الأيام

الباع الدين إيموت إبعاره...ما ينجه امن الباري و ناره

و الروحه اعله الحق يامرها...و بالراي العنده إيخبرها...وفاي و شاعت أخباره

للكوفه إتعنه إيخبرها إبراي حسين ابن الأطهار...خل تقره ابنيتها اشبايع لو رادت دين المختار

خلها إتضحي و يضمن إلها باجر ما تحرقها النار...و لو ظل الخوف إيساورها ما تخلص من الأشرار

شتجاوب ظلت محتاره...و غير الدم ما ظلت چاره

شتقول و مسلم خيرها...و بالراي العنده إيخبرها...وفاي و شاعت أخباره

بالأول صاحت يا مسلم الله اليشهد بايعناك...مبعوث الحق كلنه إنعرفك شتقول آمر عاهدناك

ننتظرك كل إحنه ابلهفه شفت إشلون إتلقيناك...حارب و إحنه اوياك إنحارب يا مسلم و إنموت إوياك

عمك حيدر حامي جاره...ما نتعذر و إحنه أنصاره

و مسلم مسرور و ينظرها...و بالراي العنده إيخبرها...وفاي و شاعت أخباره

و أهل الأفكار المعنيه حقها ابهاي العاده إتحير...هالناس إشغير موقفها و من سبب هذا التغير

لكن من وصلت للعله اشقالت أصحاب التفكير...ناس الما وفت وي حيدر منها إتوقع كل شي إيصير

طمعها الطاغي إبديناره...و إنقلبت صارت غداره

عن مسلم قلي إشغيرها...و بالراي العنده إيخبرها...وفاي و شاعت أخباره

من طلبت من عنده ايأمها و خلفه إتصلي و تأتم بيه

هذا امن الإصلاب الطيبه تعرف قدره و تعلم بيه

هيه الجانت تامل جيته و بدروب الكوفه إتانيه

بالمسجد جا ليش الوحده مسلم محتاره إتخليه

و لا بيهم من يفتح داره...و يضيف مسلم خطاره

و هالضيف القاصد ينصرها...و بالراي العنده إيخبرها...وفاي و شاعت أخباره

من شاف الوادم ما تنفع غير موقفها الشيطان ...و باعت دين العدها إبذله و إرتدت علنت عصيان

تتظاهر ما جانت عدها ذرة غيره و لا إيمان...و مسلم مطلوب إينازلها و خل يشهد عنه الميدان

قام إعليها إيشن الغاره...يحصدها إبشمرة بتاره

و بحامي الجار إيذكرها...و بالراي العنده إيخبرها...وفاي و شاعت أخباره