لا إخوه لا أنصار...بالكوفه ظل محتار

مسلم سفير حسين

مسلم سفير التضحيه جسد ولاءه إبموقفه

من عمه جعفر من علي هذا البطل يحمل صفه

أول فدائي معتني إبكل خطوه إخلاص ووفه

و حسين يعرف همته ابهاي المهمه كلفه

صاح إبوفه ووجدان ...من شجرة الإيمان

و عنده عزم و إصرار...بالكوفه ظل محتار

مسلم سفير حسين

للكوفه حين اللي وصل يحمل رساله ابيمنته

إيبشر الناس الطالبت ابموعد حسين ووجيته

و قلهم يبايعني الذي لحسين رايد بيعته

كلفني ابهذا الأمر وآنه بن عمه و غايته

و عالوعد ليكم جيت...ابهالمطلب إتعنيت

و خلي انشوف إشصار...بالكوفه ظل محتار

مسلم سفير حسين

ناس الذي ودت كتب و مشبوحه لدروب السفر

و ابكل كتاب اشطالبت إقدم يبن سيد البشر

إنت يبو اليمه الأمل تنقذنه من هذا الخطر

ما عدنه غيرك سيدي و ابجالك إنعيش ابفخر

ابمر الصبر تانيناك...و إحنه ابعهدك و بحماك

و إلهم سفيره من سار...بالكوفه ظل محتار

مسلم سفير حسين

ناس الذي جانت قبل واليها عمه المرتضه

بالعجل ليش إتغيرت و اتناست العهد المضه

واليها حماي الحمه يسقيها حكمه و موعضه

و إتجازي الاحسان ابغدر ابشرها و بغضها إتعوضه

باجر وراها إحساب...و يسألها داحي الباب

ليش ابن أخو الكرار...بالكوفه ظل محتار

مسلم سفير حسين

نسألها و إنريد السبب ناس اللي خانت بالعهد

يوم القيامه اشتعتذر اويا عذر ينفعها بعد

نفذ طلبها الرادته مسلم إجاها اعله الوعد

ما رايد اوياها الحرب مصلح ابهالغايه قصد

و من عنده تالي إتريد...يخضع الحكم ايزيد

مسلم غريب الدار...بالكوفه ظل محتار

مسلم سفير حسين

شمرة علي عقد الوله بالحرب شافت شمرته

جذامه وقفت حايره و حفرت له حفره و غدرته

و يا وسفه من سطح القصر ابيا ذنب شمرة جثته

و تالي قصرها اللي إنهدم و مسلم تعلت قبته

زوار إله ايقصدون...و بحضرته ايطوفون

و تتذكر الزوار...بالكوفه ظل محتار

مسلم سفير حسين