يا حيدر اشلون يصير المثلك عوقه قبره

و قلبك يا علي لليوم بعده إمجتف إبصبره

ما عند خبر بالصار لو عندك و تتعذر

ما هزك مصاب حسين اشلون يصير يا حيدر

بس يمكن تريد اتقول هذا وعد و مقدر

اشحال البعده يتمنه...و منك ما قطع ظنه

يصيح الكربله إتعنه

حسين ابشده يا بو حسين و شنهي البعد تنتظره

ريتك يا علي إتشوفه ما بين العده وحده

و خلصوا هله و أصله ولا ناصر بعد عنده

و بيمن بعد يستنجد و غيرك يا هو لينجده

و بالجبهه الحجر صابه ...و شيبه الدم غده إخضابه

و راد إينشفه بثيابه

و لن السهم المثلث طالع من خرز ظهره

حيله إنضهد و بيا إيد سهم الصوبه إيطلعه

ووياه إنتزع جبده يا حيدر من إينزعه

و هذا اللي يضربه إبسيف و ذاك إبرمحه ليدفعه

يعالج بآخر الأنفاس...و شابح عينه للعباس

لجن وسفه يبو النوماس

ظل فوق النهر مطروح لا يمنه و لا يسره

من كثر الجروح البيه يا حيدر سكن ونه

و لن الشمر سل سيفه يقطع منحره إتعنه

علي و شتقول لو شفته اعله صدره لمن إتثنه

طلع خنجره و شراد ...يطعن بيه أبو السجاد

إيزوح اشعنده من أحقاد

و من الكلفه يا حيدر يا ويلاه حز نحره

ورد مهره للمخيم و بصوت الظليمه إيصيح

و زينب يا علي طلعت ساعه إتقوم ساعه تطيح

و إظلم السمه و هبت بالشر و العذاب الريح

و لن صوت الوحي جبريل...صاح اتصوب التنزيل

يالتحضر الصاح إدخيل

شبلك سلبوا جسمه و هشموا يا علي صدره