صاح حسين يا زينب أظل وحدي لا رايه التفي و لا إخو عندي

ردي الخيمتج يا بت علي ردي هذا دم عضيدي إبجفي و بصدري

عباس إعله نهر الماي خليته و بصبري يزينب جسمه غطيته

لو حيل أمتلك لخيامي رديته بس إشلون أرده و منكسر ظهري

حنه ظهري شمت خويه العدو بينه إرتعش جفي و نزل دمعي إعله جفينه

ما أقدر أطلع له سهم عينه عينه النزفت إوياها نزف صبري

يا زينب أبو فاضل بعد ميعود و مخ راسه إعله جفه طشره العامود

و هناك شفت مو ماي دم الجود و هذا الدم يخويه من إنين هم أدري

سهم الصاب قلب الجود يا زينب طاح إبصدر إخويه و بالدمه إتخضب

إشلون إعليه يزينب حيلي ما يتعب و صاحب رايتي عنه أبعده دهري

يا زينب عطاشه أدري إبخيمنه هاي و لا ظل لي ابن لا ظل إخو وياي

راح اللي يجيب إلجن يخويه الماي صبرن للظهر من ينقطع نحري

صاحت زينب و صيحتها تقطر دم عله عباس مو عالماي نتألم

كل إبنات حيدر بيها المخيم و بعد عباس خوفي ينسلب خدري