إجيتج طايح إبحيره...يزينب راح أبو الغيره

يا خويه تلقيني...ظهري إنكسر عينيني...يزينب راح أبو الغيره

إجيتج و الجذم بالقوه أنقلنه...حيلي إعله النهر عفته و رحت عنه

إجيت ابطرق دمعي اليكت و الونه...طاح إحزام ظهري و بيش أشدنه

إخويه و خوته خوه...و جبينه ينضح إمروه

إبشم الهوى إمخاويني...ظهري إنكسر عينيني...يزينب راح أبو الغيره

يا زينب إجيتج من بعيد أعمت...أعثر و الجذم بالقاع ما يثبت

أعتن بالقلب و القلب بيه يعت...يقلي إشلون تقطع نوحك و تسكت

إشلون الغربت روحه...يقطع ونته و نوحه

يختي و لا تنشديني...ظهري إنكسر عينيني...يزينب راح أبو الغيره

شحجي لج يزينب من رحت يمه...و لقيت أمي الزجيه قاعده و أمه

أم عباس صبغت شيبها إبدمه ...و الزهره هوت عطر الوفه إتشمه

و لنها إتقلي يبني حسين...وين إجفوف أخيّك وين

صحت يا أمي دقوميني...ظهري إنكسر عينيني...يزينب راح أبو الغيره

و لوعه الما مثلها شفت كل لوعه...و أقول إشلون قلبي لزمته إضلوعه

حين الشاف جفي اينشف إدموعه...ينشف إدموعي بيش إجفوفه مقطوعه

و راد إيضمني الصدره...و شفته إختنق بالعبره

و ما يقدر يحاجيني...ظهري إنكسر عينيني...يزينب راح أبو الغيره

وصاني عليج إبونه مخفيه...يقلي يخاف زينب تعتب إعليه

من عندي بعد لا تنتظر جيه...إجفوفي إمقطعه و العين مطفيه

يخويه إختك إمعاهدها...و أريد العذر من عدها

و إيصبرج يوصيني...ظهري إنكسر عينيني...يزينب راح أبو الغيره

يا زينب نقصد العباس قومي أوياي...و إنجيم المناحه إعله الإخو الوفاي

من مثله شهم و الخوته شراي...قبلي ما قبل يشرب لذيذ الماي

و دمعه الحوفرت خده...أثر عن الوفه ابوعده

كل همه يجازيني...ظهري إنكسر عينيني...يزينب راح أبو الغيره