ما عندي غيرك..... بعد يا صاحب الراية

سلملي جودك .....شلك بالعلگمي ومايه

لتشمت الناس دخيلك ارحم بحالي....ارحم يعباس غربتي وغربة إعيالي....ما عندي غيرك

لجلال الله أشكي و للنبي جدي ..... على اللي كاتبتني وخانت بعهدي

أنه المظلوم أنه وفت القهر جبدي ..... أشوف الناس كلهه اتجندت ضدي

راحت كل رجالي وكل أهل ودي ..... بس انته يبو فاضل بعد عندي

لمن أشوفك أشوف الدنيه بعيونك ..... من تمشي عني أحس بغربة من دونك

بس انته ظليت كضت كل صفوة رجالي....ارحم يعباس غربتي وغربة إعيالي....ما عندي غيرك

يا سيفي وسناني ونبلتي وسهمي ..... ويا درعي اليصد عني سهم خصمي

قمر وبشوفتك ينزال كل همي ..... أحس بوحشتي لو رحت من يمي

شكولن لو أشوفك عالنهر مرمي ..... بعد بيمن أشد يا به الفضل عزمي

ما ترضه عيني يا يخويه موسد اتشوفك ..... عالشاطي مرمي صريع مكطعه جفوفك

ما ريدك تروح وأشوفك طايح كبالي....ارحم يعباس غربتي وغربة إعيالي....ما عندي غيرك

اذا عذرك تقول اعيالي عطشانه ..... ضماير مسعرة وقلوب لهفانه

العذر مرفوض يخوية واخوك آنه ..... اعصر جبدي واروي قلوب ذبلانه

أسد انته الأسد ميعوف خلانه ..... ولا يترك عرينة وباب صيوانه

عباس أريدك تخلي عينك ابعيني ..... وتشوف بيها جمر حركة صواويني

ما ريدك تموت أريدك للحرم والي....ارحم يعباس غربتي وغربة إعيالي....ما عندي غيرك

تروح بهذا جودك ناوي وين تروح..... رواحك هذا تهضم بالخيم جم روح

كفاية الأكبر كبالي ووكع مذبوح ..... اشتريد اتضيف فوك جروج قلبي جروح

كفاية اتحنة جاسم بالدم المسفوح ..... اشتريد أهلك وأموت من القهر والنوح

بس انته عندي وعليه يصعب مصابك ..... لو فارگتني أموت بحسرة غيابك

من عندي شتريد تريد تقرب آجالي....ارحم يعباس غربتي وغربة إعيالي....ما عندي غيرك

الجبل من همي يا عباس يتصدع ..... حرت والحيرة حيرة بيا أمر ينفع

أكلك روح اخاف تروح ما ترجع ..... أگلك ظل أشوف أطفال تتلوع

خليهه على الله وللنهر اطلع ..... لعلك تروي هالأطفال والرضع

خوفي برواحك تروح وما ترد لينه ..... واتذكرعضيدك حزين مشوبح بعينه

ظل فكري عليك يخويه وينشغل بالي....ارحم يعباس غربتي وغربة إعيالي....ما عندي غيرك

هذا اول وداع اتوادع آنه وياك ..... بعد عندي وداع اعله النهر ألكاك

تدري شراح أشوف اعله الشريعة اهناك ..... أشوف النهر يمه يسيل نهر دماك

أشوف السهم صوب عينك وارداك ..... ويم جسمك أشوف يسارك ويمناك

لو شفت جسمك أموت بحزني ويقهري ..... وهناك أصيحن يعباس اكسرت ظهري

شصبر الروح اذا فقدتك يالغالي.....ارحم يعباس غربتي وغربة إعيالي....ما عندي غيرك

صريع اعله النهر لو شافتك عيني ..... اذا حال الأجل ما بينك وبيني

ارد بيا خبر خوية لصواويني ..... وشجاوب زينب اختك من تلاگيني

اذا تناشدني وتحاجيني ..... شجاوبهه يريت البين يطويني

وجهك رسملي مصابي وحركة اخيامي ..... وخيول امية تغير وتسحك أيتامي

يا صاحب الجود شبح موتك تراوالي.....ارحم يعباس غربتي وغربة إعيالي....ما عندي غيرك