قصدن كربله ابهذا المسه قلبين ...قلب الطاهره وي قلب أبو الحسنين

بعدما جلجل الليل و نهاره أجله ...إجن قلب الزجيه و قلب أبو الحمله

ظلام و عالعزيز الوالده إتسأله ...إشلون إبني أعرفه يا علي إتقله

تقله هذي بس أجساد ...إشلون إنعرف أبو السجاد

ووين إبني خلص صبري يحيدر وين

وقف يم جثه قلب الطاهره الزهره ...شاف إضلوعه و إتذكر ألم كسره

صاحت هذي ريحت زينب إبنحره ...و شفايف بتي مطبوعه على صدره

هذا إبني و نظر عيني ...هذا ياعلي حسيني

من توديع زينب ميزيت حسين

ليش ابيا ذنب يبني العده ذبحوك ...و ليش اعله الترب عاري الجسد خلوك

و من ذبحوك ليش إبيا ذنب سلبوك ...و من سلبوك ليش إبخيلهم داسوك

إبنك ما بقت له إضلوع ...و حته خنصره مقطوع

عليه مقلوبه يمكنها الخلق صوبين

ون قلب الصميده و عالجسد كبّر ...يشم بجروحه و يقله يبو الأكبر

يبويه إشلون جسمك نايم إبهالحر ...مثل طر هامتي قلبي عليك إنطر

يبني هدمت صبري ...و إجيت و بارحت قبري

جزه حده و بعد حد الصبر لاوين

جسد جاوبهم إبلوعه و حرف مدمي ...يبويه إبهالظلام إشوصلك يمي

يبويه من المدينه إشجاب قلب أمي ...اخافن ينصدع من ينظر الجسمي

أخافن تستعر ناره ...يبويه و ينسه مسماره

تعيش الوالده يا والدي إبجرحين

يبويه أنصاري راحت كلها ذبحوها ...و أخبرك شمعة العريس طفوها

طبر جثة علي الأكبر تولوها ...و عبدالله رقبته إبسهم قطعوها

يبويه أهلي وولد عمي ...هاي إمطرحه يمي

خذتهم مني يا بويه صروف البين

إلتفت قلب الصميده و ما لقه البضعه ...يدور عالأثر بالقاع و يتبعه

يون يبني الشريعه حيدره إيسمعه ...وصل و ألقاه يم جثة بطل ينعه

مره يسبح إبدمه ...و مره إبمنحره إيشمه

شمس تبجي شمس فوق النهر شمسين

تقله يا علي إنظر عمل هاي الناس ...و صد جثة ابو الغيره فلا تنقاس

لا جفين لا سالم جسد لا راس ...بعد ما روح أظل يم إبني العباس

اظل ناطوره يم جثته ...و أنشده وين عاف إخته

أدري وفّه إخته الهاشمي إبجفين

سمعوا من بعيد يقرب بجي و إونين ...إجه إبلا راس قاصد للشريعه حسين

شايل بيده جود الخوه و الجفين ...خويه إيصيح يموفي إبرقبته الدين

هالجود الروه إسكينه ...و هذني إيساره و يمينه

لون شفتوا السهم من طفه نور العين