يا عباس يا حامي الضعينه إجيتك للنهر و بصوتي أنخاك

عقبك من يردنه للمدينه و إحنه الكربله إتعنينه وياك

يا بدر الهواشم آنه زينب و هذي مهجتك غيرك إشعدها

مثل الخيم نار العطش تلهب و لهروش الجبد حالك مردها

خدري إبروحتك راح و تسلب و داري طاحت إبطيحة عمدها

علينه جارت الوادم علينه هاك إخذ العتب يا با الفضل هاك

أيتام و حرم نصفق بيدينه و صوبنه الدهر بسهام فرقاك

يا با الفضل صوت الفاجعه صاح حال الدهر ما بينك و بيني

و لمن طحت عامود الخيم طاح قبل يمناك ريت إنقص يميني

و لمن رحت وياك الخدر راح و سهم الصاب عينك صاب عيني

إخلافك شلي إبعيني يا ولينه يريت إنطفت عيني قبل عيناك

و زندك يا وسف قطعوا يمينه عسن قطعوا يميني قبل يمناك

فقدتك و الخدر وياك مفقود و عقبك يا حمه ما ظل محامي

خيمنه إنسلبت إبضربة العامود و عمود الفضخ هامك فضخ هامي

و صاب القلب سهم الصوب الجود أحن و أنحب و أصيح إبقلب دامي

يخويه بس حرم بالطف بقينه ما جاك الخبر يا خوي ما جاك

خيمنه إتفرهدنه و إمسلبينه و أصبحنه غنيمه الهذا و الذاك