يا عباس غيابك ما حسبته ...عتابي عله جفوفك كتبته

ركبت على الهزل والنار بثيابي ...قبل جان الوحي يتوسل ابّابي

عتابي على جفوفك كتبته

على الناقه وإجت قصه اعله بالي ...إذا زينب مشت نص الليالي

علي يتقدم الموكب يغالي ... وخوتي عن يميني وعن شمالي

وراي انت الحرس وامشي بدلالي ... يمن تزعل إذا بين خيالي

على النوق صفت زينب سبيه ...ولاصار مصاب الصار بيه

أروح ميسره ويحديني سلابي ...قبل جان الوحي يتوسل ابّابي

عتابي على جفوفك كتبته

عجب ترحل سبيه الإنت اخوها ...بعد من هو مثلها ومثل أبوها

تعال وشوف لمّن سلبوها ...يسمعونك ترى من شتموها

يضربوها بسياط وعذبوها ... إذا عدها أهل خلهم يجوها

ياعباس تعال إنظر متنها ...تناديك يمن كافل ضعنها

يخويه للشريعة توجه اعتابي ... قبل جان الوحي يتوسل ابّابي

عتابي على جفوفك كتبته

يخويه السوط بمتوني تلوه ... وصيحن وين يا تاج الاخوه

عجب ياهل الرحم ياهل المروه ...اختكم وي خصمكم تمشي قوه

ياعباس الوقت باختك شسوه ... أخذ كل شي يريده وما تروه

أناديك يابو الغيره على بختك ... تمنيت تجي وسيف بيمنتك

وقلهم يالسألتو هاكم جوابي ... قبل جان الوحي يتوسل ابّابي

عتابي على جفوفك كتبته

يناديني الشمر بسمي سمعته ... يخويه وداعتك قصده عرفته

يريد يقول وين الكافل اخته ... أخذناها سبي وطالت سكته

يا عباس الصبر وياك اخذته ... على شاطي النهر قلبي تركته

تمنيت اظل يم الشريعه ... وابجيك يابو جفوف القطيعه

وحقك ما سدى على العالم مصابي ... قبل جان الوحي يتوسل ابّابي

عتابي على جفوفك كتبته

يا أصعب ما شفت واللي هضمني ... أنا يمك واجه الشامت ضربني

لذت بيك وصحت هذا الكفلني ... ألزم بيك ياخويه ويجرني

أبد ماخاف منك من شتمني ...على اعنادك ضربني وما رحمني

صحت وين اخويه الدق لي صدره ... بالحبال يجتفوني أخبره

غريبه وأيست متعود غيابي ...قبل جان الوحي يتوسل ابّابي

عتابي على جفوفك كتبته

عله إنياق الحزن أصفق بدية ...و أصيح الويل من دمعة رقية

بعد ذاك الدلال إشلون بية ...يريت إوياك تاخذني المنية

أحشم وينكم يهل الحمية ...أسيره بت علي بالغاضرية

تفزعون صحت وين الهواشم ...تحضرون و لا بانت علايم

أشوف إعله الرماح إتعاين أحبابي ...قبل جان الوحي يتوسل ابّابي

عتابي على جفوفك كتبته