بداية دعائي... حبيبي حسين

أحبك من قبل ما يجري بيَّ الدم

لفظت إسمك قبل لا أعرف أتكلم

يمر إسمك جروح و مدمع و مبسم

حبيبي حسينطفل آني إبغرامك و أبقه أتعلم

أشوفك حياتي...كتابي و صلاتي

وهبتك دمائي...حبيبي حسين

أنا المجنون أنا و أتباهى بجنوني

فقط أهل العشق عاقل يسموني

و غيرك ما أحب رغم اليعذلوني

إذا ترفض أشوفك أكره إعيوني

أجيك إبخضوعي...و أقدم دموعي

يصير إنحنائي... حبيبي حسين

سلاطين الزمن تتوسل إببابك

يمن حته الذهب يتوسل إترابك

مثل موج البحر من تزحف أحبابك

نموت إنعيش لازم نوصل أعتابك

طريقك نجاتي...حياتي و مماتي

إجيتك فدائي... حبيبي حسين

أنا إمحمل إذنوبي و جيتك أتوسل

إذا أدق باب غيرك أدري ما تقبل

أنا إبلياك ضايع كل شي ما أندل

يا أوسع صدر و إبجالك أتدلل

يشوقي و غرامي...إبصحوتي و منامي

صباحي و مسائي... حبيبي حسين

يا أوسع من خيالي و أبعد و أبعد

عجيبه إمحبتك كل لحظه تتجدد

فتح بابه القلب مره و عليك إنسد

و بعد ممنوع يدخل بالقلب أحد

كلام النهايه...يعشق البدايه

أوضح وفائي... حبيبي حسين

أظل محتاج إلك يحسين كل لحضه

و لا يقدر قلب يستغني عن نبضه

أسوي إشما تريد المهم بس ترضه

و الترضه عليه إنت إشكبر حضه

أطوف إعله بابك...و أقدس تُرابك

ترابك دوائي... حبيبي حسين