رغماً على كل العده إنت أمير الكوفه

إمصابك إنظل إنجدده إنت أمير الكوفه

مصرعك يا مسلم إيذكرونه خبر عن المصطفى ينقلونه

يمن شمسك دائماً عدها شروق عالم إنت و عالفضل فضلك يفوق

عن محمد ينقل الشيخ الصدوق هالخبر عن مصرعك مضمونه

مسلم إنت و للشرف سعيك حثيث مثل عمك علي إتغيث اليستغيث

لا غبار اعليه ابحقك هالحديث بالتواتر كلهم إيقرونه

هالحديث إيقول سيد المرسلين المصرعك تدمع إعيون المؤمنين

و الأملاك إتنوح ليك و بالونين مأتمك يا مسلم إينصبونه

كل الأملاك ابغربتك شاهدوك إشلون من قصر الإماره من رموك

طحت مستشهد ابدمك ضرجوك قدرك العالي العده يجهلونه

و إنت ميت بالسيوف إتحاوطوك سلبوك و من ثيابك جردوك

إبفد حبل و إنت إويه هاني جتفوك بالأزقه الجسمك يسحلونه

يوم كامل و إنت ميت تنسحل دمك إيسيل من أثر ذاك الحبل

يا سفير حسين صابر تنقتل و الأعادي الراسك يفصلونه

جرح فقدك يا غيور إبكل قلب إستشهدت عطشان و بديرة غرب

ظل ثلثتيام جسمك منصلب شنهو ذنبك جسمك يطلبونه

آه يا مسلم يعنوان الوفه يالنصرة حسين بس عن معرفه

إشلون يا مظلوم ليلة عرفه راسك الإبن الدعي يهدونه

خل يجون اليوم كل الحاربوك ابهذا قبرك يا غريب إيشاهدوك

إشلون زوارك يمسلم يعتنوك بالنياحه القبرك يطوفونه