قلبي إعليك ظل مجروح ما ظنيت مني اتروح

للوالد يبني إنطيتك المهدك ترجع ظنيتك...ما ظنيت مني إتروح

عبدالله يمن خالي المهد بعدك ريت الروح مفقوده و لا فقدك

خذت قلبي رميته امقطع ابمهدك عني غبت مثل الطيف شيردك

يبني اشلون طيفك غاب من فرقاك راسي شاب

ابلهفت قلب تانيتك المهدك ترجع ظنيتك...ما ظنيت مني إتروح

يوليدي اشبعد أترجه من دنياي اسلبت روحي من جسمي اعله شربت ماي

عني رحت ظلت لوعتك وياي رسمك يظل محفور ابوسط عيناي

صوتي صاح ما أنساك شفت الموت من فرقاك

ابصوت المدمع ناديتك المهدك ترجع ظنيتك...ما ظنيت مني إتروح

أتمنه جنت وكت الأجل يمك جان ابقلبي يوليدي اشقفت سهمك

و ريت السهم يبني صاب نحر أمك و يجري دم وريدي من قبل دمك

ريت انصاب نحري اليوم لا تنصاب يا محروم

يا من بالروح إجنيتك المهدك ترجع ظنيتك...ما ظنيت مني إتروح

يبني كربله ما جانت اببالي عني اتروح اشوفك و المهد خالي

مثل دم منحرك دمع الجفن هالي و نبلة حرمله ابفرقاك تبرالي

جبدي اعليك بالهم ذاب ظني اليوم بالطف خاب

ابصوت اهمومي ناغيتك المهدك ترجع ظنيتك...ما ظنيت مني إتروح

يا أول حلم عاش ابجفن عيني ابسهر ليلي اناغيك و تناغيني

و ما أدري مرار الطف يتانيني ومن بعدك عله المحنه يدليني

هذا اليوم أصعب يوم من دنياي شفت اهموم

نبله اتصيبك مدريتك المهدك ترجع ظنيتك...ما ظنيت مني إتروح

يا سلوة حياتي و بهجة الأيام يا من صرت لمك فاجعه و آلالام

مثل نحرك جروح الجبد ما تلتام و لو ترجع أقلك بالنواظر نام

ظني اتعود و اترويت عني اتغيب ما ظنيت

ابقلبي الهايم باريتك المهدك ترجع ظنيتك...ما ظنيت مني إتروح

يا نفحت حياتي و بالمحبه اتفوح و يا غصن التربه و نبت وسط الروح

لجل الماي لو أدري ترد مذبوح جان اسقيتك ابدمع الوفه المسفوح

دمعي اعليك سال ادموم و الدلال ظل مهموم

بين اضلوعي حاميتك المهدك ترجع ظنيتك...ما ظنيت مني إتروح