يحسين إجروحك ما طابت صابت قلبي و روحي إنصابت

عشت إوياها... ما أنساها صابت قلبي و روحي إنصابت

روحي مصايب كربله عاشتهن و عيني جروحك يالولد شافتهن

إنصابن إسهامك و أمك إتلقتهن يبني إبصدرها و تشعر إبجمرتهن

بين الونه و دمعي اليجري كل إسهامك صابن صدري

أتلقاها ... ما أنساها صابت قلبي و روحي إنصابت

يومك مصيبه و العطش صوبني بلكت يرويك الدمع آه يبني

من سهم المثلث وقع عذبني و أنده يحيدر يا علي إحضرني

زينب تنده وين إبن أمي هذا الصوت الزود همي

وين إحماها... ما أنساها صابت قلبي و روحي إنصابت

يمك و أشوفك تسحق إعليك الخيل داست على صدري و صحت منها الويل

و إعيوني وي زينب دمه إعليك إتسيل و بعيني من شفت العده إعليها إتعيل

شفت إعيالك من سلبوها شفت إخيامك من حرقوها

من طفاها... ما أنساها صابت قلبي و روحي إنصابت

راسك أشوفه إعله الرمح يالغالي و زينب أسيره و ما يجيها الوالي

حال العقيله يبني يشبه حالي من رافقت جتالك و جتالي

ناديت حسينك ظل وحده يالكرار و هاي الشده

بين إعداها... ما أنساها صابت قلبي و روحي إنصابت

ظليت أحشم بالقمر سيفك وين ريتك ييمه إبعينك إتشوف حسين

و أدري القمر ما عنده جف و لا عين و إمن إنين أجيبن رايته و الجفين

كون الكافل عنده إجفوفه و ينهض يم حسين إيشوفه

أتمناها... ما أنساها صابت قلبي و روحي إنصابت

آنه السمعتك من صحت يالأكبر يبني و جنت أسمع نحيب الخدر

شفت الشمر لمن يحز المنحر و زينب شفتها من إجت تتعثر

عالهزل راحت مسبيه و إمصاب الطف مر إعليه

وي ممشاها... ما أنساها صابت قلبي و روحي إنصابت