احسين يالحُبك ملك دلالي ما إلي غيرك وسيله ما لي

املكت دلالي او صُبح يحسين إلك گلبي دارك يا حبيبي او منزلك

او ما مِلك هالگلب غيرك ما مِلك لا و حگ الصوّرك يالغالي

إنته و احبابي اسكنت حدر الضلع وادري حبين ابگلب ما تجتمع

لاچن انته الأصل واحبابي فرع فدوه لك أهلي او حياتي او مالي

علّمتني امحّبتك معنه العشگ من سمعت الگلب بحروفك يدگ

روحي يحسين ابهيامك تحترگ او يجري دمعي من تمرّ ابّالي

او علّمتني يا شبل خير العمل اشلون احدّد موقفي اليوم الأجل

اشلون أواجه خالقي عزّ وجل ابوجه أبيض يغني عن اقوالي

واصبحت يحسين اشمّنّك هوه وانته للعلّه التمر التمر بيّه دوه

وابدرب آمالي يالغالي ضوه واعله حُبك ورّدت آمالي

يا بدر آمالي ياكلّ العمر يا نسيم الجنّه ذكرك من يمر

يا شعاع اليطلع ابنوره الفجر يا برج سور الهدايه العالي

آيضامي الترتوي ابحبّه المله آ يدامي الضمّدت دين العله

آ يسامي الجعل من طف كربله كعبه تزهر بالمجد واتلالي

علّمتنه او صرنه منّك نقتبس نخوه وايثار او إبه او عزة نفس

كل درس منّك يغالي كل درس نور يسطع للمحب يالوالي

إنته نور النه يبن خير الوره و أنته روح النه يروح الطاهره

وانته يا مولانه دنيه او آخره ابهاي نظرتنه الك منغالي

هايه نظرتنه إلك يابن البتول ثابته مثل الجبال او ماتزول

ما يهمنه العاذل اشرايد يگول واليحب باهل العذل ميبالي

وعَلَه امحّبتك هاي عادانه الزمن اوشفنه مثلك ظلم وارهاب او محن

او سبي او تقتيل او نفي او غربة وطن او صار صحنك من محبّك خالي

آيغالي واغله كل غالي او نفيس الماحضه بزيارتك خايب تعيس

چم خميس المر علينه چم خميس واحنه بالغربه او دمعنه هالي

بالغرب ننشد يبواليمه او نلوب ابيا جرم بعدونه عنك يا ذنوب

انچان حبك ذنب عنه ما نتوب لا وحگ دم منحرك يالغالي

وين ما نرحل ننادي ابفكرتك او ننشر ابحبنه مبادئ نهضتك

شيعتك حاشه تعوفك شيعتك عالعهد سرنه او نظل للتالي

سيدي او لابد يدور إلنه الفلك او ترجع الغياب يالغالي إلك

او نوصلك يا ضوه اعيوني نوصلك او تجتمع هاي الوجوه اگبالي

بالصحن من نجتمع يبن الشيم ننصب ابصحنك يوالينه الخيم

او من نشوف ابگبتك يزهي العلم ينسعد حالِ الموالي او حالي

اهناك يوم النجتمع يالغالي صوتنه ابصحنك يردد عالي

احسين يالحبك مِلك دلالي ما إلي غيرك وسيله ما لي