ساعة آلامه... صاحت أيتامه... بويه يا حيدر

وجهك و الدم إيغيبه... الله اش هاي النكبه ... بويه يا حيدر

هاي القلوب ابجرحها سمعت امئيس طبيبه...هاي العيون بدمعها سهرت الليله الرهيبه

تنظر الوجه السماوي جالبدر بالدم مغيبه...و من تحت هذا ضماده ينزل الدم اعله شيبه

عل الإبو طاحت... مفجوعه صاحت... بويه يا حيدر

هاي أقدس شيبه امخضبه ... الله اش هاي النكبه ... بويه يا حيدر

من علي و من اليتامه إنتقمت الدنيا اللئيمه...خيمه جان إعليها حيدر و ما بقت ليتامه خيمه

راحت أيام المحنه و الوكت جاب الهضيمه ...من بعد عين الأبوه زينب التصبح يتيمه

و بخد ألمها...دمعة يتمها...بويه يا حيدر

يمه صاحت و برهبه... الله اش هاي النكبه ... بويه يا حيدر

صاحت المفجوعه زينب إبليل الوداع و رهبته...مو بعد ضلع أمي بويه تسعر إبروحي جمرته

إقبالي صدر أمي و نزيفه و الجفن ذاك و دمعته...يا علي و إقبالي إنت وجهك إمخضبه جبهته

و إقبالي خوتي...أتمنه موتي...بويه يا حيدر

و لا عيش الحاله الصعبه ... الله اش هاي النكبه ... بويه يا حيدر

رايح إبجرحك يبويه و ما نصف أدري زمانك...ماخذ إوياك المتاعب عايف إجروحي إبمجانك

للقبر ماشي تسكنه يا قبر ياخذ كيانك...إترابه يحرمني يبويه شوفتك هاي و حنانك

إينغص لي يومي...يحرمني نومي...بويه يا حيدر

من شخصك عني إيحجبه... الله اش هاي النكبه ... بويه يا حيدر

يا علي ليل المصيبه إقبالي من بيتك يطلعك...و بسواد الليل بويه إخوتي تطلع تشيعك

و نعشك إقبالي أشوفه و آنه إعله الباب و أودعك...بويه لو ما خدري بويه أطلع وياهم و أتبعك

صيحتي إبحزني...وياك إخذني...بويه يا حيدر

و لا صبح بعدك طيبه ... الله اش هاي النكبه ... بويه يا حيدر

يا علي جرحك نزيفه ينقطع و بلحده يخدر...و بعدك إجروح المصيبه إبكل قلب لهبتها تسعر

و الحسن ينتظره يومه و القدر بحسين يعثر...و بعدك إيوديني وكتي الكربله بويه يحيدر

و آنه إبغربتي...إيجرحني وكتي...بويه يا حيدر

و خدري إيسلبوه بالغربه... الله اش هاي النكبه ... بويه يا حيدر