شايلينه ...كل بنينه ...و الدمع بالعين

وين إبنعش حامي الحمه ريض نريد إنقبله

نشبع وداع من الإبو هذا لسان العايله

نصرخ يجيدوم الحرب تدري إبناتك ذاهله

من يرتفع نعشك تون إتنادي يبويه معوله

اعلينه ضاقت هالرحيبه...و المحب فارق حبيبه

يا علي تنخاك ...ترتحل وياك

ياوليها... تدري بيها...و الدمع بالعين

ننشد يفراس الحرب منهُ مثل صولك يصل

يا مرعب إجيوش الكفر و نار الغضه الأحمر يصل

لو له أمر رب السمه جا محد الراسك يصل

إنت الذي ابجيش الهده إبخيبر على زنده يصل

إشلون المرادي إتجسر...و إطبرك داحي خيبر

حارت الباب...طبرة المحراب

ياولينه ...رد علينه ...و الدمع بالعين

يمنجي يونس يا علي حيدر يكشاف البله

عندي يقيني يالولي ما شك أنا ابهالمسأله

المرادي لمن صوبك خله دمومك سايله

كاتب على سيفه علي حامي الحمه و غوث المله

يا وسف حامي الحميه ...إتصوبه إبذيج المسيه

هذا سر الصار...عن علي الكرار

إعياله حوله...يندعوا له ...و الدمع بالعين

مشوا الجنازة للنجف شيلوها عالروس إبعجل

هذي جنازة والدي ركن الهده خير العمل

غوث اليندبه و يرتجي نفس النبي سيد الرسل

وياكم إيون العرش و العالم إيصيبه الوجل

دوهتني هالمصايب...و إجرحت قلبي النوايب

ضجت الأملاك ...و ناحت الأفلاك

يا درانه...يا حمانه ...و الدمع بالعين

خرت تون إعله النعش إبحرقت قلبها ناحبه

إتنادي يبويه يا علي بيه المصايب لاهبه

أنظر دموعي التنهمل يحيدر ساجبه

ماني وديعة فاطمه و حق الإبوه أطلبه

كلنه عقبك يتمونه...و من حنانك إحرمونه

من غدر الأيام...يا أبو الأيتام

ما رعونه...و إهضمونه...و الدمع بالعين

يحسين أنشدك يا حسن إبهيده الضريحه نزلوه

و بهيده هيلوا تربته هذا الأبو لا تلجموه

رشوا ترابه يخوتي و إمن العذب لا تحرموه

قعدوا على قبر الولي و إبلهفه و بلوعه إنذبوه

صيحوا و بصوت الفجيعه...إندفن ركن الشريعه

دفنوا الإيمان ...و منهج القرآن

آه يحيدر...آه يحيدر...و الدمع بالعين