يحيدر بالهضم و النوح...أودعك و القلب مجروح

بعبراتي...و آهاتي...أودعك و القلب مجروح

إلتهبت بالعرش جمرة حزن و إعتاب...و مثل هام الوصي سور القداسه إنصاب

راح الجان طود و للعدل رغاب...يبحر الجود موحش عقبك المحراب

و زينب تنظر الحاله ...تصيح إبعبره جتاله

بأناتي...و آهاتي...أودعك و القلب مجروح

تعنت زينب الليله الوالدها...و دمه دمع المصاب إيهل على خدها

تريد إعله اللطم واحد يساعدها...تقله إنهض يحيدر روحي ناشدها

عليك أنظاري مشبوحه...و قلبي ما هجع نوحه

بدمعاتي...و آهاتي...أودعك و القلب مجروح

إجيت أنقل إبجدمي قوم حاجيني...إشلون إبحسرتي بويه تخليني

يريت البين يا كرار يلفيني...و لا عالغبره بويه إتشاهدك عيني

تنازع شدة اصوابك...و أهل دمعي عله إمصابك

بحسراتي...و آهاتي...أودعك و القلب مجروح

أنا زينب يبويه الما نصف دهري...أنا المحد حزن حزني و صبر صبري

المصابك يا علي عيني تظل تجري...و عقبك للنوايب سلمت أمري

و أظل مهضومه يا حيدر...تظل مثل الجمر تسعر

جراحاتي...و آهاتي...أودعك و القلب مجروح

شحجي عن إخوتي من دنت يمه...أبو محمد يهل دمعه و أبو اليمه

يحماي الحمه الما خيب إمحشمه...وسف شيبك يبونه إتخضب إبدمه

تصيح إنهض يوالينه ...يبويه أيتام ظلينه

كصيحاتي...و آهاتي...أودعك و القلب مجروح