يتيمه واصبحت أتكفّل ايتامه من طاح الولي وما تمّم اصيامه

طاح وصوبتني طيحته ابدهشه ماصدّگ ابويه اموسد ابنعشه

ابويه الجان من عنده الحتف يخشه أخذ روحه الحتف و انختمت اعوامه

أخذ روحه الحتف ياريت اخذ روحي و جرح راسه فتح لي مصدر اجروحي

صابو هامته يا مهجتي نوحي و أنه اخلافك بعد ما أرفع الهامه

بيمن يرتفع بعد الولي راسي ابويه هيبتي وعزمي او أصل باسي

وشعوري ابفرحتي والآمي واحساسي اشلون الروح ما تتحمل آلامه

همه ومحنته من محنتي وهمي وكل همّ الفجع گلبه سره ابدمي

محن حيدر وأضيف إلها محن أمي واگضي بيها باقي العمر وايامه

اوشيفيد اليتيم الباقي من عمره لا والد إله ويتصبر ابصبره

او لا ظِل أمّ يِظله ويهجع ابكتره ومن كل صوي دهره امسدّد اسهامه

او شيجرعه الدهر من يجفه شيجرعه واشحال اليتيم الوالده ايودعه

ويشوف الناس يم النعش مجتمعه او يصد وما يشاهد اُمه گدامه

اودع والدي واتلفت ابحسره واشوف اخواني عالميمنه وعاليسره

واصيحن ريت جانت حاضره الزهره وين الزهره اخذها الدهر بأحكامه

أصيحن تاره يمّه ويا علي تاره اگعدو وسّووا ليه يا هلي جاره

نهار النايبه ما تنطفي ناره و ليل النايبه يا فاگد اينامه

أبد ما نام ليلي ابضيعة الوالي يا يمّه ومثل حالج صُبح حالي

تركتي اطفال وآنه اخواني أطفالي صرت اُم و ابو إلهم وخدامه

أخدمهم واباريهم على عيني واضحي لاخوتي كل عمري واسنيني

لجن يا يمّه يوم الطف اعذريني لو شفتيني أمشي وعيني سجّامه

ابيوم الطف ييمه دمعتي تجري وبين الموته أمشي امدوهنه ابأمري

ادوّر حسين وين احسين ما أدري طايح وين اخوته وتلهب اخيامه

ادّور اعليه بين اخيامه و المصرع و چني ابصوت من بين الجثث يطلع

يصيح اهنا اخوچ امخضب امگطع يهالحره تعالي ولملمي اعظامه

ألمّه اعظامه يمّه واجمع اعياله واتكفّل حريمه وارعه أطفاله

أخاف اعليها من الدهر واهواله ومن چتال اخويه وخيله وازلامه

ييمّه او يا علي چم دمعه راح اسفح عليكم عالحسن عالمرمي بالمذبح

آنه ادري ابطيحة الكرار راح اصبح يتيمه اخلافه واتكفّل بالايتامه