مكتوبه بإسم السجاد ...هاي الليله

هاي الولاده يا ناس...خير و سعاده يا ناس

من العصمه هالليله إنولد سادس نور

نور الزهه الموسه و تجله إعله الطور

ما بين ركن العرش و اللوح إيدور

بيه إبتشر بيت الإله المعمور

فرحه و تهاني و إنشاد ... هاي الليله

و إنولد بدر الإرشاد... هاي الليله

هاي الولاده يا ناس...خير و سعاده يا ناس

بيت النبوه إمكلل بأفراحه

ميلاد إشراق الوفه و مصباحه

طير السعد يخفق علينه إجناحه

أزهار جنات الخلد نفاحه

من الجنه فاحت أوراد... هاي الليله

حقق أمل كلمن راد... هاي الليله

هاي الولاده يا ناس...خير و سعاده يا ناس

من الكعبه نسمات المحاسن فاحت

من يثرب المكه البشاير لاحت

إغيوم الكدر طوح ضعنها و راحت

و إبها الفرح أمة محمد صاحت

بالفرحه نقصد وفاد ... هاي الليله

إنهني السبط عالميعاد... هاي الليله

هاي الولاده يا ناس...خير و سعاده يا ناس

صفوه إعتنت منهم أسياد الأمه

إتهني الحسين إبسادس أهل العصمه

و كل الحواريين حضروا يمه

خبرهم إبسره و قداسة إسمه

سميته زين العباد ... هاي الليله

و إنولد فرع الأمجاد... هاي الليله

هاي الولاده يا ناس...خير و سعاده يا ناس

هذا الذي يحفظ شرع باريكم

هذا الذي من بعدي حجه إعليكم

الدرب العقيده الساميه يهديكم

من كل معضلات الفتن يحميكم

إلكم بشاير تنعاد... هاي الليله

و إتوحدت كل أضداد... هاي الليله

هاي الولاده يا ناس...خير و سعاده يا ناس

هالناس طلعوا بالأمل مبتشرين

زهوة أماني و بالفرح مغمورين

إبمولد إمام الأمه من بعد حسين

هذا اليصون أمجادهم دنيه و دين

ليلة خلود و أمجاد... هاي الليله

و الفرح أصبح يزداد... هاي الليله

هاي الولاده يا ناس...خير و سعاده يا ناس