آه يا شوق ألما يبارح دمعي ألي يسيل مشتعل مثل النجوم أبهدوة الليل

آنه عاشق وأليحب احسين معذور يا جرف يقدر يجابه لو هوى السيل

لا تلومون قلبي أونحيبه قلبي معذور يبجي ألحبيبه

حقها تشتاق روحي الغريبة قصة الشوق راسك تشيبه

قلبي لو يهوى أويحب ما يعرف أيخون وآنه قلبي أمن المهد بحسين مفتون

آنه من أذكر حبيبي أتطيح الدموع يمكن أبشوف الحبيب أتطيح العيون

عذب الناس نوحي أو ونيني مثل الطيور صاير حنيني

يرهب الليل كلما يجيني ألشوف الأحباب مشبوحة عيني

العين من كثر الدموع أتعذر الماي آنه لو يعقوب حاضر يبجي وياي

آنه من كثر العشق بحسين جنيت آنه وارث عابس أبدمعات عيناي

بجى الدموع شوقي أوحناني وانته حاشاك قلبك نساني

ابشاطي الدموع حبك رماني اوصار الفراق دمعة زماني

يدري ألي يفارق حبيبه أبنار الأشواق وأليحب أشلون يحمل هذا الفراق

طبع ألي يفارق حبيبي أيعيش مجروح أشلون لو جان القلب لحسين مشتاق

مثل النجوم ظل جفني صاحي ريت الدموع داوت جراحي

تبدي الهموم لو طر صباحي طير والشوق كسر جناحي

قلبي من يذكر حبيب أتهل دمه العين روحي ما أدريها جابت هالوفا امنين

بالهوى العذر أسمعت مجنون العقول وآنه عدّيت الجنون أبحبي لحسين