و أشبه علي الكرار...إبهمتي و عزمي

رغم الشفته...إبصبري لزمته...إبهمتي و عزمي

زينب و أصيح اليوم...آنه الحملت إهموم...دهري الرماني

و إتحملت آلالام ...تشهد لي الأيام...صبري كفاني

من صبري ما مليت...و بعزمي إتحديت...غدرت زماني

جارت عليَّ إعداي...و جمرت هضم دنياي...بين المحاني

دهري بداها إوياي...إبلوعه و مصايب

و تالي إنتهت دنياي... ضيم و نوايب

دهري فجعني...حزني صحبني...إبهمتي و عزمي

أول مصاب الصار...جدي النبي المختار...نوره تغيب

و إنقلبت الأصحاب...و بعيني شفت الباب... نيرانه تلهب

و أمي الزجيه إتصيح ...تمشي و ترد إتطيح...و أسمعها تنحب

إتصيح إكسروا ضلعين...و إتنادي حيدر وين...وينه يزينب

متوسد الأعتاب...محسن أنظره

خله إبدليلي إصواب... و بروحي جمره

محسن فقدته ...دمعي درفته ...إبهمتي و عزمي

مظلومه أم حسين...غيبها عنه البين...و عمري تكدر

و صحبتني الأحزان ...و ما غمضت الأجفان ...بهمومي أسهر

و النوب أشد إمصاب ...راوني داحي الباب...لمن تطبر

و غاب الأبو الصنديد...صحت العمر شيفيد...بعدك يحيدر

بغيبة علي الكرار ...ظلمه حياتي

و عشت إبقلب محتار ...من نايباتي

إبحزني و عويلي...سهرانه ليلي...إبهمتي و عزمي

بعد امي و الكرار...هذانه بين أكدار...وحدي و يتيمه

أسهر و أعيد أيام...جانت فرح و أحلام...و صارت هضيمه

و زادت علي إجروح...شفت الحسن مطروح ...إبحاله أليمه

راح الحسن مظلوم...جبده إنفطر بسموم...جعده اللئيمه

إبتشييعه قلبي إنضام ...و فكري إبدهشه

شفت العده بسهام... تتلقه نعشه

كل ساعه نكبه ...و كل ساعه ضربه...إبهمتي و عزمي

و إتوالت الآلام...و بكربله الظلام...دارت عليه

و عيني تشوف أجساد...من هاشم الأمجاد...فوق الوطيه

شبل الحسن جسام...و الأكبر علي الضرغام ...ظلوا رميه

و شفت القمر ممدود...و إمطبر إبعامود...بالغاضريه

راعي العلم و الجود... قطعوا يمينه

كل الأمل مفقود ...من عقب عينه

إبهاي المصيبه ...آنه الغريبه...إبهمتي و عزمي