تندبك شيعتك كل يوم إلك ثارات تطلبها

عرفنه إيعود كل غايب مهما طول إغيابه

تعال الباب ينتظرك يريد إيسمعه إعتابه

تعال و شاهد المحراب إسأله و إسمع إجوابه

يجاوب لمن إتسأله ...عن هامت أبو الحمله

مصيبه إعليك مو سهله

و أصحاب السقيفه اليوم غيرك من يحاسبها

شيعتكم يبو صالح عله الثارات ملهوفه

يغايب ما عرفنه العيد يمته إهلالك إنشوفه

الحلم يمته حقيقه إيصير و يفرح مسجد الكوفه

نشوف إبجفك الرايه ...يمهدي و نوصل الغايه

نروح إوياك مشايه

نوصل كربله و زينب تشرح لك مصايبها

نروح القبر أبو اليمه لمن نوصل القبره

إهناك إنشوف عبدالله متوسد على صدره

نجيب الماي و إنشربه و إنشاهد سهم نحره

إشحال الينذبح بيده ...ضامي و ينظر إوليده

يا صبر الذي إيفيده

من رد بيه للمخيم إجت أمه إشيجاوبها

نروح العمك العباس نشرب ماي من جوده

و من إنشوف سهم العين وجوب إنقبل إزنوده

بعدهي الرايه يالمهدي عد عباس موجوده

لا هيهات ينطيها ...إله بأيد راعيها

و بجفك تعليها

إخذها و صيح يا عباس و صول إبزود صاحبها

يالمهدي و نروح إوياك يم زينب نناشدها

من هجمت عليها الخيل يا حامي اليساعدها

و يوم الجابوا الهزل إسأل منهو صعدها

و يوم السعرت إخيمها ...حيدر ما حضر يمها

و جم صوت اليألمها

عجب ما ينهض العباس و الشامت يسلبها

يالمهدي و نرد للدار و إنشوف الحصل بالدار

بلكت نجبر المكسور لمن نشلع المسمار

منهو اللي شتم أمك نشوف و منهو شب النار

يا ظالم إجه و ما رد ...يا جف العليها إمتد

يفور الدم و لا يبرد

نشوف الضلع لو محسن يا جرح اليعذبها