تعال و شوف... أنا الملهوف

تمر إسنين لحظاتك... أظل أحسب علاماتك ...تعال و شوف

يغايبنه تعال و شوف و لو بعض الحجي إيزعلك

حي إنت و تشوف الحال ما يحتاج أشرح لك

يغايب يا جرح ياذيك هاي الرافضه إتسألك

يسيف النايم إبغمدك على يا موزمه إنسلك

دموع العين... تسألك وين

تسألك وين ... دموع العين

يمن ما تنسه ثاراتك... أظل أحسب علاماتك ...تعال و شوف

أمشي إعليك ضلع أمك لا تزعل يمهدينه

إذا بيتك يهدمونه بعد يا بيت يحمينه

لأن ساكت يسيف الموت يصير أكثر بعد بينه

و إقصد للبقيع و شوف حقد الناصبه إعلينه

سكوتك طال...صعب هالحال

صعب هالحال...سكوتك طال

تعال و شوف شماتك... أظل أحسب علاماتك ...تعال و شوف

صوت المحسن إيناديك عليك إنشبحت أنظاري

إخذ إبثار عبدالله قبل لا تآخذ إبثاري

يمهدينه إنذبح عطشان و إيشوف النهر جاري

إذا ما تطفي نار إضماه تظل ما تنطفي ناري

أدير العين...و أسألك وين

أسألك وين ...أدير العين

ترف يا يوم راياتك... أظل أحسب علاماتك ...تعال و شوف

يالمهدي و لا غيرك حبيب و عيني تنتظره

مته المعبود يرحمنه و أشوفك سيفك إتشهره

يغايب و المثل حالي يعاتب شخصك إتعذره

أحس إبضربة المسمار و أسمع صرخة الزهره

ضلع مكسور...دمع مجمور

دمع مجمور...ضلع مكسور

معاناتي معاناتك... أظل أحسب علاماتك ...تعال و شوف

تصيح إجروح سامره يغايب ليش ما تفزع

العدل يالمهدي مهما غاب تخلص غيبته و يرجع

و إحنه اليا وكت نبقه نندبك و الخصم يسمع

يقلي وين مهديكم إذا موجود خل يطلع

خرافه إيقول...و لا معقول

و لا معقول...خرافه إيقول

تظل تنزف جراحاتك... أظل أحسب علاماتك ...تعال و شوف

مته يا غيرة الكرار سيفك بالزعل ينسل

كلمن يضد داحي الباب يبوس أجدامك و يندل

كل متكبر و ظالم يجيك إيقوم يتوسل

عليك إبنحر عبدالله إذا منهم عذر تقبل

تصفي إحساب...تحز إرقاب

تحز إرقاب ...تصفي إحساب

إلك مشتاقه ساحاتك... أظل أحسب علاماتك ...تعال و شوف

يمهدي الدنيه لو مالت بس سيفك يعدلها

و تدري إبراية العباس بس جفك يلوق إلها

إخذها و صيح يا زينب صول إبهمتك كلها

إطلب ثار إخت عباس خل يرتاح كافلها

تصول إجروح ...عله المذبوح

عله المذبوح... تصول إجروح

عله الميزان ضرباتك... أظل أحسب علاماتك ...تعال و شوف